شەكارادا 49900 مىڭ دوللارىنان ايىرىلعان انا: قىتايدا قىلمىسكەر اتانباپ ەدىم
كەشە تەلارنا ارقىلى ارىزدانعان گۇلجان ءماۋىتحانعا قاتىستى سوت ءىسى 17- ناۋرىزدا وتەدى ەكەن. بۇگىن وسى حاباردى ەستىپ كوڭىلى قۇلازىعان جالعىزىلىكتى انانىڭ ايتار بازىناسىن ءتىلشى تىڭداپ قايتقان ەدى.
بۇل تۋرالى 31- ارنا حابارلادى.
استاناعا كەلگەلى تۇيىنشەكتەرىم جينالمادى دەپ وسىلاي مۇڭىن ايتقان گۇلجان ءماۋىتحان، 2-3 كۇننەن كەيىن تاعى دا جولعا شىعامىن دەيدى. باس قالاعا كەلىپ ادىلدىك ىزدەپ جۇرگەن جالعىزباستى اناعا بۇگىن «سوتقا كەلىڭىز» دەگەن حابار جەتىپتى.
«17- كۇنى سوتقا شاقىرىپ جاتىر» دەگەندە تاڭەرتەڭنەن بەرى جىلادىم. «55 جىل ءومىر وتكىزگەندە، قىتاي مەملەكەتىندە جۇرگەندە قىلمىستى اتانباپ ەدىم، ەلىم-جۇرتىم دەپ كەلگەندە قىلمىستى اتانىپ، سوتقا تارتىلاتىن بولىپ وتىرمىن» دەپ باعانادان بەرى بالاما دا شىرىلداپ جىلادىم»، - دەيدى قىتايدان ورالعان قانداسىمىز گۇلجان ءماۋىتحان.
«بالاما ۇرىسپاعاندا قايتەم، جان-ايقايىمدى ەستيتىن باسقا قۇلاق بولماسا» دەيدى. «نۇر وتاننان» باستاپ، قۇزىرلى ورگاننىڭ ءبىرقاتارىنا ارىزدانىپ شىعىپتى. 10 كۇندەي ۋاقىت وتسە دە، ءالى جاعىمدى جاڭالىق ەستىمەگەن. ەسەسىنە، شەكارادا ۇستالعان بەينەجازبالارى مەن اقپاراتتارى قىتايداعى الەۋمەتتىك جەلىلەردە تارالىپ كەتىپتى. ونى وقىعان ارعى بەتتەگى قازاقتار جۇرەكسىنىپ وتىر ەكەن.
«ار جاقتاعى بۇكىل ەل-جۇرت بولسىن، ءبارى «بۇل قالاي بولادى سوڭى؟ قازاقستانعا بارىپ جاتقان ەلدى شەكارادا توناپ جاتىر دەگەننىڭ ءبارى شىندىق پا؟» دەپ وسىنىڭ ءبارى ۇلكەن اڭىز تۋدىرىپ وتىر. ول جاقتاعى ەل دۇرلىگىپ جاتىر»، - دەيدى گۇلجان ءماۋىتحاننىڭ كەلىنى گۇلسارا داۋەنحان.
كەدەنشىلەر اقشانى تاركىلەۋ شاراسى مەملەكەتتىك تىلدە ءوتتى دەگەن بولاتىن. الايدا، قازاقشا دەگەننىڭ وزىندە قىتايداعى قانداستار ءۇشىن تۇسىنىكسىز سوزدەر كوپ ەكەن.
«تۇسىنبەيتىن سوزدەرىمىز كوپ. دەكلاراتسيا دەيدى، ءبىز ونداي نارسەنى تۇسىنبەيمىز. ودان كەيىن «شتراف» دەگەندى. «پال» دەيدى بىزدە. «پال اقى» دەيدى «شتراف» دەگەندى» ، - دەيدى ءماۋىتحان.
ايىپپۇل دەمەكشى، گۇلجان ءماۋىتحان قاجەت بولسا ايىپپۇلىمدى تولەۋگە دايىنمىن دەيدى. تەك، استانادان پاتەر الۋعا ارناعان بار جيناعىنان ايىرماسا بولعانى دەپ وتىر. زاڭدى دەپ وزىنە قايتارعان 10 مىڭ دوللاردى جولاقىسى مەن پاتەراقسىسىنا تولەپ، قالعانىن ادۆوكاتقا دايىنداپ قويعان. ەندىگىسى 17- ناۋرىزداعى سوتتىڭ شەشىمىنە بايلانىستى بولماق.
«ءادىل زاڭ بولماسا، قايدا بولسا دا، الەمگە بولسا دا جاريالاپ، وسى اقشام ءۇشىن جانىمدى پيدا قىلايىن دەپ وتىرمىن»، - دەپ تۇيىندەدى ءسوزىن اشىنعان انا.
