ساراپشىلار: استانا اقپاراتتىق ساياساتقا 48 ميلليارد تەڭگە جۇمسادى
بۇل تۋرالى 2- ناۋرىز كۇنى استانادا وتكەن ب ا ق- تىڭ مەملەكەتتىڭ قارجىلاندىرۋى تۋرالى جيىندا "قۇقىقتىق مەديا- ورتالىق" قوعامدىق قورىنىڭ ديرەكتورى ديانا وكرەموۆا حابارلادى.
جيىندا قوعامدىق ۇيىم 2016 -جىلدىڭ مالىمەتتەرى مەن سوڭعى جەتى جىلعا قاتىستى دەرەكتەرىن ۇسىندى. وكرەموۆانىڭ سوزىنە قاراعاندا، قازاقستاندا ب ا ق- قا قارجى ەكى باعىت بويىنشا - مەملەكەتتىك تاپسىرما جانە مەملەكەتتىك تاپسىرىس ارقىلى بولىنەدى.
- مەملەكەتتىك تاپسىرمانى جىل سايىن ون ب ا ق الادى. مۇنداي ماسەلە مىنادا - سومانىڭ قايدان الىناتىنىن جانە ونىڭ قالاي تابىلاتىنىن ءبىز باقىلاي المايمىز. ياعني، بۇل ب ا ق- تار جىل سايىن وسى وسى قارجىنى ەشقانداي كونكۋرسسىز الادى. 2010 -جىلى بۇل سوما 17 ميلليارد بولسا، ەڭ كوپ بولىنگەن 2015 -جىلى ول 42 ميلليارد تەڭگە، 2016 -جىلى 41 ميلليارد بولدى. ال بيىلعا 36 ميلليارد تەڭگە ەسەپتەلدى، - دەدى ديانا وكرەموۆا. ول جۇمسالعان قارجىنىڭ تيىمدىلىگىن ءدال باعالايتىن كريتەريلەر جوعىن ايتادى.
استاناداعى جيىندا وتكەن جىلى رەسپۋبليكالىق بيۋدجەتتەن بولىنگەن 48 ميلليارد تەڭگەگە مەملەكەت جاريالاعان كەيبىر لوتتاردا كورسەتىلگەندەي "مەملەكەتتىڭ جاعىمدى بەينەسىن قالىپتاستىرۋعا ارنالعان وڭ ماتەريالدار" جاسالعانى ايتىلدى.
- مەن وتانعا دەگەن پاتريوتيزم مەن سۇيىسپەنشىلىكتى قالىپتاستىراتىن ماتەريالدار قاجەت دەگەنمەن كەلىسەمىن. ءبىراق بۇل ماتەريالدار العا قويعان ماقساتتى قانشالىقتى ورىندايدى دەگەن سۇراق بار. ءبىز بۇل قىزمەتتىڭ ەشقانداي ناتيجەسىن كورىپ تۇرعان جوقپىز، ولار ەسەپ بەرمەيدى، - دەدى ديانا وكرەموۆا.
قور باسشىسى جيىندا مەملەكەتتىڭ اقپاراتتىق ساياساتىن ورىنداۋعا قاتىستى كونكۋرستىڭ جەڭىمپازى تۋرالى سلايد تا كورسەتتى. وندا وتكەن جىلى 23 ميلليون تەڭگەگە ءدىن ماسەلەلەرىنە قاتىستى اقپاراتتىق-ءتۇسىندىرۋ شارالارىن ۇيىمداستىرىپ، جۇرگىزۋگە ارنالعان لوتتى Kazcommservice كومپانياسى ۇتىپ العانى كورسەتىلگەن. ءبىراق بۇل كومپانيانىڭ رەەسترىندە ونىڭ "قانداي دا ءبىر ناقتىلانباعان تاۋارلاردى كوتەرمە باعامەن ساۋدالاۋمەن" اينالىساتىنى ايتىلعان. وكرەموۆانىڭ سوزىنە قاراعاندا، بۇل كومپانيا سونىمەن قاتار ەلەكتر قۇرال- جابدىقتارىن دايىنداۋ كونكۋرسىنا دا قاتىسىپ جاتىر.
جيىنعا قاتىسىپ جاتقان اقپارات جانە كوممۋنيكاتسيا مينيسترلىگىنىڭ وكىلدەرى اتالعان پروبلەمالاردان حاباردار ەكەنىن جانە "شەنەۋنىكتەردى جارنامالاۋمەن" اينالىسپايتىنىن مالىمدەدى. مينيسترلىك وكىلى ءلاززات سۇيىندىكتىڭ ايتۋىنشا، شەنەۋنىكتەر مەملەكەتتىك اقپاراتتىق ساياساتىن قارجىلاندىرۋ جاعىن جەتىلدىرۋدى جوسپارلاپ وتىر. بۇل بويىنشا توعىز ادامنان قۇرالاتىن، قوعام وكىلدەرى تارتىلاتىن ارنايى كەڭەس قۇرىلادى جانە ول كەڭەس قاي ب ا ق- قا قانشا قارجى ءبولى كەرەگى تۋرالى ۇسىنىسىن بىلدىرەدى.
