تايۋان ارالىنداعى ۇشاق اپاتىنان قازا تاپقاندار سانى 48 ادامعا جەتتى
بەلگىلى بولعانداي، «ترانس ازيا ەيرۋەيز» كومپانياسىنا قاراستى ۇشاق ارالدىڭ گاوسيۋن قالاسىنان ماگۋن شاھارىنا بەت العان. ءبىراق اۋا رايىنىڭ كۇرت ناشارلاۋى سالدارىنان ماگۋننىڭ اۋەجايىنا بىردەن قونۋدىڭ ءساتى تۇسپەگەن.
ءسويتىپ لاينەر اتالعان ماڭايدى 2 ساعاتقا جۋىق ۋاقىت اينالا ۇشقان. اۋە كولىگىنىڭ ەكيپاجى ونى قوندىرۋعا ەكىنشى رەت تالپىنىس جاساپ، رۇقسات سۇراعان كەزدە اياق استىنان ديسپەتچەرمەن بايلانىس ءۇزىلىپ كەتەدى. كۋاگەرلەردىڭ ايتۋىنشا، لاينەر جەرگە قۇلاعاننان كەيىن اپات سوڭى ورتكە ۇلاسقان. قازىر وقيعا ورنىندا قۇتقارۋشىلار جۇمىس ىستەپ جاتىر. وسى كەزگە دەيىن اپات قۇرباندارىنىڭ تەك 36 سىنىڭ ءمايىتى تابىلعان. قايعىلى وقيعاعا بايلانىستى «ترانسازيا ەيرۋەيز» اۋە كومپانياسىنىڭ پرەزيدەنتى اپات قۇرباندارىنىڭ تۋىستارىنان كەشىرىم سۇرادى.
TransAsia Airways كومپانياسى قازا تاپقانداردىڭ وتباسىنا 33 مىڭ دوللاردان تولەيدى، دەپ حابارلادى يتار- تاس.
بۇدان باسقا، اپات سالدارىنان جاراقاتتانعان جولاۋشىلارعا 6 مىڭ دوللاردان بەرىلمەك.
چۋي ي چۋنگ، «ترانس ازيا ەيرۋەيز» كومپانياسىنىڭ پرەزيدەنتى:
- مەن قايعىلى قاسىرەتكە بايلانىستى اپات قۇرباندارىنىڭ وتباسىلارىنا كوڭىل ايتىپ، شىن جۇرەكتەن كەشىرىم وتىنەمىن. ءبىز اتالعان وتباسىلارعا قولدان كەلگەن كومەكتى ايامايتىن بولامىز. جانە اپاتتى بۇگە- شۇگەسىنە دەيىن تەرگەيمىز.
