بيلعى جىلى 480 اۋىل جاڭعىرتىلادى - ۇكىمەت باسشىسى
«اۋىلدىق جەرلەردە تۇرمىس ساپاسىن جاقسارتۋ ماقساتىندا «اۋىل - ەل بەسىگى» جوباسى اياسىندا 2021 -جىلى 480 اۋىل جاڭعىرتىلادى. 106 ميلليارد تەڭگەگە 1140 جوبا ىسكە اسىرىلادى»، - دەدى پرەمەر- مينيستر ۇكىمەتتىڭ كەڭەيتىلگەن وتىرىسىندا.
اسقار ماميننىڭ اتاپ وتۋىنشە، جوبالاردىڭ باسىم بولىگى تۇركىستان، جامبىل، شىعىس قازاقستان، قىزىلوردا، اقمولا جانە سولتۇستىك قازاقستان وبلىستارىندا جوسپارلانىپ وتىر.
2021 -جىلعى ماقسات ەكونوميكا ءوسىمىن 3,7 پايىز دەڭگەيىندە قامتاماسىز ەتۋ.
«ۇكىمەت بيىل ءبىرقاتار نىسانالى كورسەتكىشتەرگە قول جەتكىزۋ ءۇشىن بەلسەندى جۇمىس جۇرگىزۋدە. بۇل - ەكونوميكانىڭ ءوسۋ دەڭگەيىن 3,7-4 پايىز ارالىعىندا قامتاماسىز ەتۋ»، - دەدى پرەمەر- مينيستر ۇكىمەتتىڭ كەڭەيتىلگەن وتىرىسىندا.
ۇكىمەت باسشىسىنىڭ اتاپ وتۋىنشە، سونداي- اق وسى جىلدىڭ سوڭىنا دەيىن 8 تريلليون تەڭگەگە 415 ينۆەستيتسيالىق جوبانى ىسكە اسىرۋ، 17 ميلليون شارشى مەتر تۇرعىن ءۇيدى پايدالانۋعا بەرۋ جوسپارلانىپ وتىر. سونىمەن قاتار، ءبىلىم بەرۋ جانە دەنساۋلىق ساقتاۋ نىساندارىن، ينفراقۇرىلىمدى سالۋ جانە جاڭعىرتۋ، اۋىز سۋعا قولجەتىمدىلىكتى ارتتىرۋ كوزدەلەدى.
