ەكۆادوردا ءزىلزالا قۇرباندارىنىڭ سانى 480 گە جەتتى
«بىزدە جوعالعاندار تىزىمىندە 2 مىڭ ادام بولعان. قازىر ولاردىڭ ءۇش ءجۇزىنىڭ قايدا ەكەنى انىقتالدى»، - دەپ حابارلادى ەلدىڭ ءى ءى م باسشىسىنىڭ ورىنباسارى ديەگو فۋەنتەس.
ءزىلزالادان زارداپ شەككەندەر سانى 2,5 مىڭ ادامنان اسىپ كەتتى. قىزىل كرەست ۇيىمىنىڭ مالىمەتىندە ەكۆادوردىڭ 100 مىڭنان استام تۇرعىنى كومەككە ءزارۋ ەكەندىگى كورسەتىلگەن.
ەسكە سالا كەتسەك، سەنبى كۇنى كەشكە قاراي ەكۆادوردىڭ جاعالاۋىندا تەربەلىسى 7,8 جويقىن جەر سىلكىنىسى تىركەلدى. ا ق ش- تىڭ گەولوگيالىق قىزمەتىنىڭ دەرەگىنە سەنسەك، جەر سىلكىنىسى وشاعى جاعاداعى مۋيسن قالاسىنان 27 شاقىرىم جەردە 19 شاقىرىم تەرەڭدىكتە ورىن العان.
اپات سالدارىنان عيماراتتار قيراپ، جولدار بۇلىنگەن. قالا باسشىسى پەدەرنالەستىڭ ايتۋىنشا ءزىلزالا وشاعىنا جاقىن تۇستاعى عيماراتتار تولىعىمەن قيراعان.
پرەزيدەنت رافاەل كوررەا يتالياعا رەسمي ساپارىن كەيىنگە قالدىردى، ول اپاتتى سوڭعى 70 جىلداعى ەڭ قايعىلى وقيعا دەپ مالىمدەدى.
اۆتور: قانات مامەتقازى ۇلى
