11:10, 03 - قىركۇيەك 2015 | GMT +5
يسلامدى قابىلداعان شىركەۋ قىزمەتكەرى 480 ادامدى دىنگە الىپ كەلدى
استانا. قازاقپارات - رۋاندا افريكالىق مەملەكەتىندە حريستيان ءدىنى قىزمەتكەرى ءوزى يسلام ءدىنىن قابىلداپ، سوڭىنان جۇزدەگەن ادامنىڭ قۇبىلاعا ءجۇز بۇرىپ، مۇسىلمان بولۋىنا سەبەپكەر بولدى، دەپ حابارلايدى IslamNews.
ساليم ميكداد ەسىمدى پاستور يسلام عالىمىمەن پىكىرلەسكەننەن سوڭ مۇسىلمان بولۋعا بەل بۋادى. ازداعان ۋاقىتتاردان كەيىن ول حاق ءدىن تۋرالى ءوز قاۋىمىنا ناسيحات ايتقان. بۇرىنعى شىركەۋ وكىلىنىڭ ۋاعىزىنىڭ ناتيجەسىندە 25 -تامىز كۇنى رەسمي تۇردە 480 ادام يسلام ءدىنىن قابىلداعان.
ايتا كەتۋ كەرەك، رۋاندا ەلىندەگى مۇسىلمان قاۋىمى جالپى حالىقتىڭ %4,6 قۇرايدى. بۇل ەلدە يسلام ءدىنىن قابىلداۋشىلار قاتارى نەگىزىنەن كاتوليكتەر، پروتەستانتتار بولىپ تابىلادى.
