15:00, 11 - قىركۇيەك 2016 | GMT +5
بوستاندىققا شىققان ازاماتتىڭ قالادان 48,2 كيلومەتر الىسقا ۇزاۋىنا قۇقىعى جوق
استانا. قازاقپارات - 1981-جىلى ا ق ش پرەزيدەنتى رونالد رەيگانعا قاستاندىق جاساعان 61 جاستاعى امەريكالىق دجون حينكلي ۆاشينگتونداعى پسيحياتريالىق ەمحانادان بوساتىلىپ ۋيليامسبۋرگ قالاسىنداعى (شتات ۆيردجينيا) ۇيىنە كەلدى، دەپ حابارلايدى Reuters اگەنتتىگى.
فەدەرالدىق سۋديا شىلدە ايىندا حينكلي قوعامعا قاۋىپ كەلتىرمەيدى دەپ شەشىپ، ونىڭ ۇيىنە قايتۋىنا ۇكىم شىعارعان.
الايدا حينكليگە سۇحبات بەرۋگە، ارنايى رۇقساتسىز الەۋمەتتىك جەلىگە تىركەلۋىنە بولمايدى. عالامتورعا كىرۋگە مۇمكىندىگى بولسا دا وعان ءوزى جاساعان قىلمىسى تۋرالى اقپارات ىزدەۋگە تىيىم سالىنعان. سونىمەن قاتار، وعان ىشىمدىك ىشۋگە، بىرەۋ ەرتىپ جۇرمەسە قالادان 48,2 كيلومەتر الىسقا ۇزاۋىنا قۇقىعى جوق.
حينكلي 1981-جىلى 30- ناۋرىزدا ۆاشينگتونداعى «حيلتون» قوناقۇيىنىڭ جانىندا رەيگاندى اتقان. التى وقتىڭ ءبىرى ريكوشەتپەن پرەزيدەنت كەۋدەسىنە تيگەن.
سوتتا حينكليگە 13 ايىپ تاعىلىپ، اقىرىندا ول اقىل-ەسى دۇرىس ەمەس دەپ تانىلعان.
