قوناقجاي وتباسى: ش ق و-دا اۋىلدا ءۇش اپتا تۇرىپ قازاق ءتىلىن ۇيرەنۋگە 47 بالا ءوتىنىم بەردى

وسكەمەن. قازاقپارات - شىعىس قازاقستان وبلىسىندا «قوناقجاي وتباسى» جوباسى اياسىندا قازاق ءتىلىن ۇيرەنۋ ءۇشىن اۋىلدا تۇرۋعا 50 گە جۋىق بالا ءوتىنىم بەردى، دەپ حابارلايدى قازاقپارات ءتىلشىسى.

ش ق و ءبىلىم باسقارماسى باسپا ءسوز قىزمەتىنىڭ مالىمەتىنە سۇيەنسەك، بيىل وڭىردە العاش رەت قولعا الىنىپ وتىرعان مەملەكەتتىك ءتىلدى وقىتۋ ماقساتىنداعى «قوناقجاي وتباسى» جوباسىنا ءوتىنىم قابىلداۋ جالعاسىپ جاتىر.

«بۇگىنگى تاڭدا جوباعا قاتىسۋعا 47 بالانىڭ اتا-اناسى ءوتىنىش بىلدىرگەن. وتىنىشتەر گلۋبوكوە، التاي اۋداندارى، ريددەر، شەمونايحا جانە وسكەمەن قالالارىنان ءتۇستى. جوسپار بويىنشا وقۋشىلار اۋىلدارعا 10 ماۋسىمدا كەلىپ، 30 ماۋسىمعا دەيىن بولادى»، - دەلىنگەن اقپاراتتا.

اۋىلداردا ارنايى شتاب جۇمىس ىستەيدى. ونىڭ قۇرامىنا پوليتسەيلەر، پسيحولوگتار مەن مۇعالىمدەر كىرەدى.

ال اتا-انالار ءۇشىن WhatsApp جەلىسىندە توپ قۇرىلىپ، كۇنىنە ەكى رەت ەسەپ جىبەرىلەدى.

ايتا كەتەيىك، جوباعا قاتىسۋعا نيەت بىلدىرگەندەر ءوتىنىشتى 25-مامىرعا دەيىن جىبەرە الادى.

بەرەل، ورەل جانە كاتونقاراعاي اۋىلدارىنداعى 32 وتباسى بالالاردى قابىلداۋعا دايىن.

ەسكە سالساق، وسىعان دەيىن ش ق و-دا قالا بالالارى اۋىلدا ءبىر وتباسىنىڭ ۇيىندە 20 كۇن تۇرىپ، قازاق ءتىلىن ۇيرەنەتىنىن حابارلاعان ەدىك.

اۆتور:

تالعاتجان مۇحامەتبەك ۇلى