استاناداعى ۇلتتىق مۋزەيگە ءبىر تۇندە 47 مىڭ ادام باردى - فوتو
وسىلايشا، وتكەن جىلعى رەكورد جاڭارتىلدى. بىلتىر شاراعا 30 مىڭعا جۋىق ادام قاتىسقان. بۇل تۋرالى مادەنيەت جانە سپورت ءمينيسترى اسحات ورالوۆ جازدى، دەپ حابارلايدى قازاقپارات.
«ەڭ الدىمەن، مۋزەيدىڭ كىرەبەرىسىندەگى بىرنەشە مەترلىك كەزەك پەن كەلۋشىلەرگە تولى زالدارعا كوزىم ءتۇستى. اۋا رايىنىڭ جايسىزدىعى مەن كەشكى ۋاقىت بولعانىنا قاراماستان، ادامدار وتباسىلارمەن كەلىپ جاتتى. وسىعان بايلانىستى، اۋدانى 74 مىڭ شارشى مەتردى قۇرايتىن جانە 200 مىڭنان استام ەكسپوناتى بار ەلدەگى ەڭ ۇلكەن مۋزەيگە بارلىق تىلەك بىلدىرۋشىلەر ارەڭ سىيدى، ال كەيبىر زالداردا مۇلدەم ينە شانشار ورىن بولمادى. الايدا كوتەرىڭكى كوڭىل- كۇي، دوستىق، وتباسىلىق جانە شىنىمەن مەرەكەلىك اتموسفەرا بولعانىن ايتا كەتۋ كەرەك»، - دەپ جازدى مينيستر.
ايتا كەتەيىك، «مۋزەيلەر ءتۇنى» - وتاندىق مادەنيەت قىزمەتكەرلەرى كۇنىن مەرەكەلەۋگە ارنالعان ءىس-شارالار باعدارلاماسىنىڭ ءبىر بولىگى. سالتاناتتى ءراسىم بارىسىندا ەلىمىزدىڭ ءار وڭىرىنەن كەلگەن ۇزدىك مۋزەي قىزمەتكەرلەرى «مادەنيەت سالاسىنىڭ ۇزدىگى» توسبەلگىسىمەن ماراپاتتالدى.
ۇلتتىق مۋزەي قابىرعاسىندا كونسەرتتىك جانە ويىن-ساۋىق باعدارلاماسى، ويىندار، كۆەستتەر، دارىستەر، مۋزەي رەستاۆراتورلارىنىڭ شەبەرلىك ساباقتارى، قولونەرشىلەر جارمەڭكەسى، تەاترلاندىرىلعان ەكسكۋرسيالار جانە بىردەن بىرنەشە ەكسپوزيتسيا ۇيىمداستىرىلدى. كەلۋشىلەر «مۋزەيلەر تۇنىنە» ارنايى دايىندالعان كىتاپ جانە اۆتورلىق قۋىرشاقتار كورمەسىن تاماشالادى، سونداي-اق بەلگىلى تاريحشىلار مەن باسقا دا تانىمال تۇلعالار ەكسكۋرسيا وتكىزگەن «جۇلدىزدى گيد» جوباسىنا قاتىستى.
«مىڭداعان كەلۋشىلەرمەن بىرگە مەن دە بىرنەشە زالدى ارالاپ، ولاردا ۇسىنىلعان ەكسپوناتتارمەن تانىستىم. اتاپ ايتقاندا، جاقىندا اشىلعان پالەونتولوگيا زالىنا قوناقتار تاراپىنان قىزىعۋشىلىق ەرەكشە بولدى. ءىس-شارادا باسقا ەلدەردەن دە كوپتەگەن قوناقتار بولعانىن ايتا كەتكەن ءجون»، - دەدى اسحات ورالوۆ.
