استانادا شەتەلدەن اكەلىنگەن 475 كولىكتى زاڭسىز تىركەگەن قىلمىستىق توپتىڭ ءىسى سوتقا جولداندى

استانا. قازاقپارات - انتيكوررۋپتسيالىق قىزمەت استانا قالاسى بويىنشا «ازاماتتارعا ارنالعان ۇكىمەت» مەملەكەتتىك كورپوراتسياسى» ك ە ا ق مامانداندىرىلعان ءبولىمىنىڭ قىزمەتكەرلەرى مەن ازاماتتىق تۇلعالار قاتارىنان ۇيىمداستىرىلعان توپقا قاتىستى سوتقا دەيىنگى تەرگەپ- تەكسەرۋدى اياقتادى، دەپ حابارلايدى قازاقپارات.

قىلمىستىق ءىس «Web-Модуль» جانە «ИИС ЦОН» اقپاراتتىق جۇيەلەرىندە كولىك قۇرالدارى تۋرالى مالىمەتتەردى زاڭسىز ەنگىزۋ جانە جويۋ، مامىلەلەردىڭ جازباشا نىساندارىن قولدان جاساۋ فاكتىلەرى بويىنشا تەرگەلگەن.

«قىلمىستىق توپ 2022 -جىلدىڭ قاڭتار- مامىر ايلارى ارالىعىندا زاڭنامادا قاراستىرىلعان الىمدار مەن تولەمدەردى تولەمەستەن شەتەلدەن اكەلىنگەن 475 اۆتوكولىكتى زاڭسىز تىركەدى.

وسىعان بايلانىستى مەملەكەتكە 1,4 ميلليارد تەڭگە كولەمىندە اسا ءىرى كولەمدە زالال كەلتىرىلدى.

بارلىعى 30 ادام قىلمىس جاسادى دەپ كۇدىكتەلۋدە. ولاردىڭ قاتارىندا استانا قالاسى بويىنشا № 2 ارنايى حالىققا قىزمەت كورسەتۋ ورتالىعىنىڭ باسشىسى، 4 پوليتسيا قىزمەتكەرى مەن اۆتوكولىكتەردى زاڭسىز راسىمدەۋ بويىنشا ءوز قىزمەتتەرىن ۇسىنعان دەلدالدار بار»، - دەپ جازدى انتيكوردان.

قازىرگى ۋاقىتتا قىلمىستىق ءىس ماتەريالدارىمەن تانىسۋ ءجۇرىپ جاتىر.

سونىمەن بىرگە، كونستيتۋتسيانىڭ 77-بابى 3-تارماعىنىڭ 1-تارماقشاسىنا جانە قىلمىستىق- پروتسەستىك كودەكسىنىڭ 19-بابى 1-بولىگىنە سايكەس، قىلمىستىق قۇقىق بۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن ءاربىر ادام كىناسىز دەپ ەسەپتەلەدى.

انتيكوررۋپتسيالىق قىزمەت ازاماتتاردى كولىكتەردى تىركەۋ كەزىندە دەلدالداردىڭ قىزمەتىنە جۇگىنبەۋگە شاقىرادى.