قازاقستاندا جاڭا جىل ءتۇنى ابونەنتتەردىڭ 46 پايىزى بايلانىسسىز قالادى

 استانا. قازاقپارات - اقپارات جانە كوممۋنيكاتسيالار مينيسترلىگى NUR. KZ رەداكتسياسىنىڭ سۇرانىسى بويىنشا sim+ج س ن+imei تىزبەگىمەن تىركەۋدەن وتكەن ۇيالى بايلانىس ابونەنتتەرىنىڭ سانى تۋرالى اقپارات بەردى.

«بەلسەندى ابونەنت» دەپ سوڭعى ءۇش ايدا شوتى تولتىرىلعان SIM- كارتانى اتاي الامىز.

ال انىقتالعان اقپارات بويىنشا، «كار-تەل» ج ش س- Beeline بايلانىس وپەراتورىنىڭ 10 ميلليون بەلسەندى ابونەنتىنىڭ 80 پايىزى، ياعني، 8 ميلليون ابونەنتى تىركەۋدەن وتكەن.

ال «موبايل تەلەكوم- سەرۆيس» ج ش س - Tele2 مەن Altel بايلانىس وپەراتورلارىنىڭ 7 ميلليون بەلسەندى قولدانۋشىلارىنىڭ 71 پايىزى، ياعني، 5 ميلليون قولدانۋشىسى تىركەلگەن ەكەن.

سوڭعى «كسەلل» ا ق- Activ جانە Kcell بايلانىس وپەراتورلارىنىڭ 9,2 ميلليون قولدانۋشىسىنىڭ ىشىندە 12 پايىزى، ياعني، 1,13 ميلليون قولدانۋشىسى تىركەۋدەن ءوتىپتى.

قورىتىندى بويىنشا، جالپى قازاقستان ۇيالى بايلانىس وپەراتورلارىندا 26,2 ميلليون بەلسەندى ابونەنت بولسا، ونىڭ ىشىندە 14,13 ميلليون قولدانۋشىسى تىركەۋدەن وتكەن. بۇل بارلىق بەلسەندى ابونەنتتەردىڭ 54 پايىزىن قۇرايدى.

ۇيالى بايلانىس ابونەنتتەرىن تىركەۋدەن وتكىزۋ جولدارى تۋرالى قوسىمشا حابارلايمىز.

1. «موبايل تەلەكوم- سەرۆيس» ج ش س - Tele2 مەن Altel وپەراتورلارى بويىنشا:

ابونەنتتى ءوز بەتىنشە تىركەۋدى 6914 نومىرىنە ج س ن ءنومىرىن جازىپ جىبەرۋ ارقىلى، *6914# كومانداسىنا ج س ن ءنومىرىن تەرۋ ارقىلى جۇزەگە اسىرۋعا بولادى؛

ابونەنتتى ساتۋ جانە قىزمەت كورسەتۋ كەڭسەلەرى ارقىلى تىركەۋ مۇمكىندىگى بار؛

ابونەنتتىڭ تىركەلگەن- تىركەلمەگەنىن *6914# USSD- كومانداسىن تەرۋ ارقىلى انىقتاۋ كەرەك؛

ابونەنتتى http://imei.altel.kz نەمەسە http://imei.tele2.kz سايتىنا ج س ن ءنومىرىن جىبەرۋ ارقىلى تىركەۋگە بولادى؛

تىركەۋدىڭ دۇرىس وتكەنىن *835# كومانداسىن تەرۋ ارقىلى انىقتاۋ كەرەك؛

قايتا تىركەلۋ ءۇشىن Tele 2 نەمەسە Altel بايلانىس سالوندارىنا بارۋ قاجەت.

2. «كار-تەل» ج ش س (بيلاين):

ابونەنتتى ءوز بەتىنشە تىركەۋدى 6914 نومىرىنە ج س ن ءنومىرىن جازىپ جىبەرۋ ارقىلى، *691# كومانداسىنا ج س ن ءنومىرىن تەرۋ ارقىلى جۇزەگە اسىرۋعا بولادى؛

ابونەنتتى ءوز بەتىنشە «مەنىڭ بيلاينىم» قوسىمشاسى بويىنشا، 6914 نومىرىنە حابارلاسۋ ارقىلى، Qiwi تەرمينالدارىمەن تىركەۋ مۇمكىندىگى دە بار.

ابونەنتى ساتۋ مەن قىزمەت كورسەتۋ ورىندارىندا، «قازپوشتا» ا ق بولىمدەرىندە نەمەسە www.beeline.kz سايتى ارقىلى دا تىركەي الاسىز.

3. «كسەلل» ا ق (اكتيۆ جانە كسەلل):

ابونەنتتى ءوز بەتىنشە تىركەۋدى 6006 نومىرىنە جسن ءنومىرىن جازىپ جىبەرۋ ارقىلى، *660# كومانداسىنا ج س ن ءنومىرىن تەرۋ ارقىلى جۇزەگە اسىرۋعا بولادى؛

ابونەنتتى ءوز بەتىنشە kcell.kz يلي active.kz سايتتارىنداعى جەك كابينەتكە كىرۋ ارقىلى تىركەي الاسىز.

ابونەنتتەردى ساتۋ-قىزمەت كورسەتۋ ورتالىقتارىندا دا تىركەۋ مۇمكىندىگى بار.

ايتا كەتەيىك، ءبىر ابونەنت قۇرىلعىعا بىرنەشە ابونەنت نومىرلەرىن تىركەي الادى. سونداي-اق، ءبىر ابونەنتتىك ءنومىر بىرنەشە ابونەنتتىك قۇرىلعىعا تىركەلە الادى. ال ءنومىرىن تىركەۋدەن وتكىزبەگەن قازاقستاندىقتار 2019-جىلدىڭ 1- قاڭتارىنان باستاپ بايلانىس قىزمەتى مەن عالامتوردى پايدالانا المايدى.