ەر ادام جازىقسىز ءولىم جازاسىنا كەسىلىپ 46 جىلدان سوڭ تۇرمەدەن اقتالىپ شىقتى - فوتو
ول 2014-جىلى كىناسىز دەپ تانىلىپ بوستاندىققا شىقتى. ول ءومىرىنىڭ كوپ بولىگىن جازىقسىز تەمىر توردا وتكىزگەن.
78 جاسىندا بوستاندىققا شىققان يۆاونىڭ دەنساۋلىعى سىر بەرەدى. ول 34 جىل بويى جالعىز ءومىر ءسۇرىپ، سىرتقى ورتامەن بايلانىسپاعان. ءار كۇنى ءولىم جازاسىنا كەسە مە دەگەن ۇرەيمەن وتىرعان.
يۆاو 2011-جىلى ەڭ قاتاڭ جازانى ۇزاق كۇتكەن ادام رەتىندە گيننەسستىڭ رەكوردتار كىتابىنا ەندى.
يۆاو حاكامادا 50 جىل بۇرىن كاسىبي بوكسشى بولعان. ءوز ەلىندە تابىسقا جەتكەن. ءسويتىپ جۇرگەندە ءومىرى كۇرت وزگەرەدى. ونى 1966-جىلى 30- ماۋسىمدا بولعان ادام ولىمىنە كىنالى دەپ تاۋىپ، ءولىم جازاسىن كەسەدى. پاستا شىعاراتىن ءوندىرىس كومپانياسىنىڭ باسشىسى ءوز ۇيىندە ءولى كۇيىندە تابىلعان. قىلمىسكەر ونىڭ ايەلى مەن بالاسىن دا ءولتىرىپ كەتەدى. كەيىننەن عيماراتتى ورتەپ جىبەرگەن.
وسى ىسكە كومپانيانىڭ وكىلى يۆاو حاكامادا باستى كۇدىكتى رەتىندە تانىلعان. كومپانيادان قانعا بويالعان جەيدە تابىلعان. تەرگەۋ ىسىنە سايكەس، جەيدە يۆاونىكى دەپ ايتىلادى. ءدال سول ايعاق ونىڭ كىنالى قىلىپ شىعارعان.
1968-جىلدىڭ قىركۇيەك ايىندا ونى ءولىم جازاسىنا كەسەدى. ونىڭ قورعاۋشىسى دا بولماعان. جاۋاپ الۋ كەزىندە ۇرىپ-سوعىپ، سۋ بەرمەي قويادى. دارەتحاناعا جىبەرمەي وزىنە تاعىلعان ايىپقا كەلىسىمىن بەرۋگە كوندىرەدى.
كەلەسى ون جىل ىشىندە ايىپتالۋشى ءوز ءىسىنىڭ قايتا قارالۋىن قولعا الىپ كورەدى.
1980-جىلى جوعارعى سوت ۆەرديكتتى زاڭدى دەپ تانىدى. ءۇش جىلدان سوڭ حاكامادا ۇلىنا حات جازىپ جىبەرەدى. حاتتا: «مەن سەندەرگە اكەلەرىڭنىڭ كىناسىز ەكەنىن دالەلدەپ شىعام. پوليتسيا دا، سوت تورەشىسى دە، بۇل ءىستى جۇرگىزگەندەر دە مەنىڭ كىناسىز ەكەنىمدى بىلەدى. مەن بۇل جەلىنى ءۇزىپ، سەندەرگە ورالام» دەپ جازىلعان.
حيدەكو حاكامادا 46 جاستاعى باۋىرىنىڭ جازىقسىز سوتتالعانى ءۇشىن كۇرەسىپ باقتى. ول ادۆوكاتتارعا ءۇش رەت اپەللياتسياعا ارىز جازدىرعان.
بۇل كەزدەرى يۆاو ءولىم جازاسىن كۇتەتىن جالعىز ادامدىق كامەرادا وتىرعان. ول ۇزاق ۋاقىت جالعىز قالعاندىقتان ويىن دۇرىس جەتكىزە المايتىن كۇنگە جەتەدى. اپكەسىمەن دە، جاقىندارىمەن دە كەزدەسۋدەن باس تارتادى.
44 جىلدان كەيىن اپكەسى حيدەكو د ن ك- تەستىنە قول جەتكىزەدى. ونداعى قان قۇرامى جەيدەدەگى قان توبىنا سايكەس كەلمەگەن. ءىس قايتا قارالىپ، ەكى جىلدان سوڭ 2014-جىلدىڭ ناۋرىز ايىندا يۆاونى تۇرمەدەن شىعارادى.
جاپونيادا جالعىزباستى كامەراداعىلار سىرتقى الەممەن مۇلدە بايلانىس ۇزەدى. ولاردى جاقىندارىمەن دە سويلەستىرمەيدى. قۇقىق قورعاۋشىلار جاپونيانىڭ ءولىم جازاسىنا كەسىلگەندەرگە قولداناتىن جۇيەنى سىنعا الدى. سوتتالۋشىعا قاشان ولتىرەتىندەرىن ايتپايدى. سوندىقتان ول ۇنەمى قورقىنىش ۇستىندە ءولىمدى كۇتۋمەن بولادى.
تىلشىلەر سونشا جىلدان سوڭ تۇرمەدەن شىققان حاكامادانىڭ جۇزىنەن قۋانىش لەبىن بايقاي المايدى. ول تىلشىلەردىڭ سۇراعىنا جاۋاپ بەرە المادى. ەشقانداي جاۋاپ الماعان سوڭ جۋرناليستىڭ ءبىرى «قانداي تاماق جەگىڭىز كەلىپ تۇر؟»، - دەپ سۇرايدى. سول ۋاقىتتا وپەراتوردىڭ ءبىرى: «ونى جايىنا قالدىرىڭدار. كورمەيسىڭدەر مە؟ ول ءومىر ءسۇرۋدىڭ نە ەكەنىن ۇمىتىپ قالعان»، - دەدى.
وسى كەزدە ول باسىن كوتەرىپ: «سىرا مەن تورت جەگىم كەلەدى»، - دەگەن.
يۆاو حاكامادا قالىپتى ومىرگە ارەڭ ورالادى. وعان اپكەسىنىڭ ەسىل ەڭبەگى مەن سابىرى كومەكتەستى. اپكەسى باۋىرىن قالىپتى ومىرگە قايتا ورالىپ، كۇلە الاتىن كۇيگە جەتكىزدى.
