الماتىدا ءورت سالدارىنان 46 پاتەرگە زاقىم كەلدى

الماتى. قازاقپارات - بۇگىن الماتى اكىمى باۋىرجان بايبەك «يۋبيلەينىي» سۋپەرماركەتى مەن «كوروۆابار» ءدامحاناسى اۋماعىنداعى ءورت بولعان جەردى ارالادى.

الماتى اكىمىنىڭ ورىنباسارى ەرلان اۋكەنوۆ قالپىنا كەلتىرۋ جۇمىستارى بويىنشا ءتيىستى تاپسىرمالار بەردى. بۇل جۇمىستاردى ءدامحانانىڭ مەنشىك يەلەرى ورىندايتىن بولادى.

قالپىنا كەلتىرۋ جۇمىستارى 13- مامىرعا دەيىن اياقتالۋى ءتيىس. ال ازىرگە زارداپ شەككەن پاتەرلەردىڭ يەلەرى وزدەرىنە ۋاقىتشا باسپانا ىزدەۋگە ءماجبۇر بولۋدا. بەلگىلى بولعانىنداي، ءورتتىڭ سالدارىنان 46 پاتەر زاقىمداندى.

ەستەرىڭىزگە سالا كەتەلىك، ءدامحانادا بولعان ءورت سالدارىنان 7 ادام قۇتقارىلىپ، 120 ادام ەۆاكۋاتسيالاندى. ولاردىڭ ىشىندە ءۇش بالا بار. ءبىر ادام ۋىتتى گازعا ۋلانۋ نىشانىمەن اۋرۋحاناعا جاتقىزىلدى. باسقالاي زارداپ شەككەندەر مەن قۇربان بولعاندار جوق. ءتىلسىز جاۋدى جويۋعا ءورت ءسوندىرۋ قىزمەتىنىڭ جەكە قۇرامىنان 115 ادام مەن 21 ارنايى تەحنيكا، سونداي-اق، جەرگىلىكتى پوليتسيا قىزمەتكەرلەرى، جەدەل مەديتسينالىق جاردەم دارىگەرلەرى، كوممۋنالدىق قىزمەتتەردىڭ قىزمەتكەرلەرى جۇمىلدىرىلدى. ءورت تاڭعى ساعات 05:52 دە اۋىزدىقتالىپ، 06 ساعات 36 مينۋتتا تولىىقتاي ءسوندىرىلدى. ءورتتىڭ جالپى اۋماعى - 1100 شارشى مەتردى قۇرادى.