شىعىس قازاقستان وبلىسىنىڭ اكىمى ايماقتا جەتىسپەيتىن ماماندىقتار ءۇشىن 467 گرانت ءبولدى

وسكەمەن. قازاقپارات - شىعىس قازاقستان وڭىرىنە اسا قاجەت مامانداردى دايارلاۋعا وبلىس بيۋدجەتىنەن 400 گرانت بولىنبەك. ول ءۇشىن تالاپكەر 50 بال جيناسا دا جەتكىلىكتى، دەپ حابارلايدى قازاقپارات ءتىلشىسى.

 اتالمىش 400 گرانتتىڭ سىرتىندا 67 بيۋدجەتتىك ورىن جانە بار. وبلىس اكىمىنىڭ ورىنباسارى اسەم ءنۇسىپوۆانىڭ ايتۋىنشا، بۇل بيۋدجەتتىك ورىندار 3 جوعارى وقۋ ورنىنا بەرىلمەك. اتاپ ايتقاندا، ءال- فارابي اتىنداعى قازۇۋ «ارحەولوگيا جانە ەتنولوگيا» ماماندىعىنا - 10 ورىن، «مۋزەي ءىسى جانە ەسكەرتكىشتەردى قورعاۋ» ماماندىعىنا - 5 ورىن قاراستىرىلعان. جەرگىلىكتى س. امانجولوۆ اتىنداعى ش ق م ۋ- دىڭ «ساۋىقتىرۋ جانە دەنە شىنىقتىرۋ» ماماندىعىنا - 10 ورىن، «تىرشىلىك قاۋىپسىزدىگى جانە قورشاعان ورتانى قورعاۋ» ماماندىعىنا - 5 ورىن بولىنگەن. ال د. سەرىكبايەۆ اتىنداعى ش ق م ت ۋ- عا 37 ورىن ءبولىنىپ وتىر. ونىڭ 20-سى - «مەتاللۋرگيا» ماماندىعىنا، 10-ى - «اۆتوماتتاندىرۋ جانە باسقارۋ» ماماندىعىنا، جەتەۋى - «تەحنيكالىق فيزيكا» ماماندىعىنا باعىتتالعان.

ەڭ باستىسى، قازاق ۇلتتىق ۋنيۆەرسيتەتىنە تۇسكىسى كەلگەن تالاپكەردىڭ ۇ ب ت سەرتيفيكاتىنداعى بالل مولشەرى 65-تەن كەم بولماۋى ءتيىس. ال جەرگىلىكتى قوس ۋنيۆەرسيتەتتىڭ بيۋدجەتتىك ورنىنا ءتۇسۋ ءۇشىن 50 بالدان جوعارى جيناسا، جەتىپ جاتىر. اتالمىش گرانت يەلەرىنىڭ ەسىمى 11-15 - تامىز ارالىعىندا وتەتىن كوميسسيا وتىرىسىنان كەيىن بەلگىلى بولماق. قۇجات قابىلداۋ مەرزىمى 5 - تامىزدان 10 - تامىزعا دەيىن ۇزارتىلىپ وتىر.

 «وتكەن جىلى ءبىزدىڭ وبلىستان 890 تۇلەك شەت مەملەكەتكە وقۋعا كەتكەن. 90 پايىزى رەسەيدى تاڭدادى. وندا دا ماسكەۋ مەن سانكت- پەتەربۋرگتى تاڭداعاندار تىم از. كوبى توم، نوۆوسىبىر قالالارىنا تۇسكەن. ءبىز قوسىمشا گرانتتار ءبولۋ ارقىلى وسى تەندەنتسيانى توقتاتساق دەيمىز. ەڭ باستىسى، وسى گرانت ارقىلى وقىعان تۇلەكتەرگە جۇمىس ورنى دايىن تۇر»، - دەيدى اسەم ءنۇسىپوۆا.

قازىرگى تاڭدا شىعىس قازاقستانعا 1304 جوعارى ءبىلىمدى مامان قاجەت. جوعارىدا اتالعان گرانتقا يە بولعىسى كەلگەندەر وسى ءۇش ۋنيۆەرسيتەتتىڭ قابىلداۋ كوميسسيالارىنا جۇگىنۋى شارت.

اۆتور: ەسىمجان ناقتىباي