46 جىلدىق ناۋقان: قىتايداعى ەڭ ۇلكەن ءشول اعاشپەن قورشالدى
استانا. KAZINFORM - قىتاي ەلدەگى ەڭ ۇلكەن تاكلا- ماكان ءشولىن جاسىل جەلەكتەندىرۋ بويىنشا 46 جىلدىق ناۋقانىن اياقتادى. اتالمىش جوبا ەلدىڭ شولەيتتەنۋمەن كۇرەسۋ جانە كوكتەمدە ەلدىڭ ءبىراز بولىگىندە جۇرەتىن قۇمدى داۋىلداردى ازايتۋ ءۇشىن قولعا الىندى. بۇل تۋرالى Reuters اگەنتتىگى حابارلادى.
شىڭجاڭنىڭ سولتۇستىك- باتىسىنداعى ءشولدىڭ وڭتۇستىك شەكاراسىنىڭ كەيىنگى 100 مەترىنە اعاش وتىرعىزۋ ارقىلى تاكلا- ماكان ءشولىن قورشاپ تۇرعان 3000 شاقىرىمدىق «جاسىل بەلدەۋ» جوباسىنىڭ اياقتالعانى اتاپ ءوتىلدى.
ءشولدى اعاشتارمەن قورشاۋ جۇمىستارى 1978 -جىلى حالىق اراسىندا «ۇلى جاسىل قورعان» دەگەن اتپەن بەلگىلى «ءۇش سولتۇستىك قورعاۋ بەلدەۋى» جوباسى اياسىندا باستالعان. وسى ۋاقىت ىشىندە 30 ميلليون گەكتار اۋماققا اعاش وتىرعىزىلدى.
ەلدىڭ قۇرعاق سولتۇستىك- باتىسىندا اعاش وتىرعىزۋدىڭ ارقاسىندا قىتايدىڭ جالپى ورمان القابى وتكەن جىلدىڭ اياعىندا 25 پايىزدان استى. بۇل كورسەتكىش 1949 -جىلى شامامەن 10 پايىزدى قۇراعان. تەك شىڭجاڭدا كەيىنگى 40 جىلدا ورمان ۇلەسى 1 پايىزدان 5 پايىزعا دەيىن ءوستى.
تاكلا-ماكان ءشولىنىڭ شەتىنە كوشەتتەر وتىرعىزۋ جالعاسادى. سونىمەن قاتار ءشولدىڭ باتىس شەكاراسىنداعى اۋىلشارۋاشىلىق جەرلەرى مەن ساياباقتاردى قورعاۋ ءۇشىن جاڭا ورمان جەلىلەرىن قۇرۋ جوسپارلانىپ وتىر.
دەرەكتەرگە سۇيەنسەك، قىتايدىڭ اعاش وتىرعىزۋداعى بەلسەندى ارەكەتىنە قاراماستان، ەل اۋماعىنىڭ 26,8 پايىزى ءالى كۇنگە دەيىن «شولەيت» ساناتىنا جاتادى. بۇل كورسەتكىش 10 جىل بۇرىن 27,2 پايىز بولاتىن.
