ش ق و-دا ايەلشە كيىنگەن 45 جاستاعى ەركەك شاعىن نەسيە ۇيىمىن توناپ كەتتى - ۆيدەو

ش ق و پوليتسيا دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، 21-ناۋرىزدا ساعات 11.30-دا ريددەر قالالىق پوليتسيا بولىمىنە حابارلاسقان شاھار تۇرعىنى ميكروقارجى ۇيىمى كەڭسەسىنىڭ تونالعانىن ايتقان. ءوز سوزىندە ول بەيتانىس ايەل ادامنىڭ ءىرى كولەمدەگى اقشانى جىمقىرعانىن جەتكىزدى.

«وقيعا ورنىنا ءتارتىپ ساقشىلارى دەرەۋ كەلىپ جەتتى. جەدەل- ىزدەستىرۋ شارالارى بارىسىندا كريمينالدىق پوليتسيا بولىمشەسىنىڭ قىزمەتكەرلەرىنە جابىرلەنۋشىلەر مەن كۋاگەرلەر ءبىراۋىزدان ۇرىنىڭ قىز ەكەنىن العا تارتتى. الايدا ءبىر ساعاتتىڭ ىشىندە جەدەل ۋاكىلدەر كۇدىكتى ەر ادامدى ۇستادى. بۇل - ريددەر قالاسىنىڭ 45 جاستاعى تۇرعىنى بولىپ شىقتى» دەلىنگەن حابارلامادا.

انىقتالعانداي، ول قالاداعى بازارلاردىڭ بىرىندە ورنالاسقان پايىزسىز قارىز بەرەتىن ميكروقارجى ۇيىمىنىڭ كەڭسەسىنە شابۋىل جاساۋدى كوپتەن بەرى جوسپارلاپ جۇرگەن. ايەلدەرگە ارنالعان كاپيۋشونى بار اق ءتۇستى كۇرتكەنى، وكشەلى اق ەتىكتى، ۇزىن پاريك پەن قارا شارف كيگەن ەركەك بەت- الپەتىن جاسىراتىن مەديتسينالىق ماسكا تاعىپ الدى.

«كەڭسەگە كىرگەن توناۋشى مەنەدجەردى قارۋ ءتارىزدى زاتپەن قورقىتىپ، ءىرى كولەمدەگى قاراجاتتى ۇرلاپ كەتكەن. قازىرگى ۋاقىتتا اتالعان فاكتى بويىنشا ق ر قىلمىستىق كودەكسىنىڭ 191-بابى 2-بولىگىنە سايكەس سوتقا دەيىنگى تەرگەۋ امالدارى جۇرگىزىلۋدە» دەلىنگەن اقپاراتتا.

اۆتور: تالعاتجان مۇحامەتبەك ۇلى