قازاقستان-قىتاي اراسىنداعى ساۋدا-ستاتيستيكا ايىرماشىلىعى 45 پايىزعا تومەندەدى
بۇل تۋرالى بۇگىن ۇكىمەت وتىرىسىندا ق ر قارجى ءمينيسترى ەرۇلان جاماۋبايەۆ ايتتى، دەپ حابارلايدى قازاقپارات ءتىلشىسى.
«وتكەن جىلى مەملەكەتتىك كىرىستەر ورگاندارى 11,4 مىڭ سالىقتىق تەكسەرۋ جۇرگىزدى. بۇل 2019-جىلمەن سالىستىرعاندا 1,6 ەسە از، ال ناتيجە كورسەتكىشى 29 پايىزعا ارتىق. قاشىقتان باقىلاۋدىڭ جاڭا ادىستەرى ەنگىزىلدى. بۇل ناقتى تاۋارلارى جوق مامىلەلەر مەن قولما-قول اقشاعا اينالدىرۋ بويىنشا سحەمالارعا قاتىساتىن تاۋەكەلى جوعارى كومپانيالاردى ونلاين رەجيمدە انىقتاۋعا مۇمكىندىك بار»، - دەدى ول.
ءمينيستردىڭ ايتۋىنشا، «قازىناشىلىق سۇيەمەلدەۋ» جوباسىنا قاتىسۋشىلار بويىنشا تولەنگەن سالىق كولەمى 24 پايىزعا ءوسىپ، 2020-جىلى 202 ميلليرد تەڭگەنى قۇرادى.
«قىتاي حالىق رەسپۋبليكاسىنىڭ ەكسپورتى - قازاقستان رەسپۋبليكاسىنىڭ يمپورتى باعىتى بويىنشا ستاتيستيكالىق دەرەكتەردەگى ايىرماشىلىقتار وتكەن جىلى 45 پايىزعا دەيىن تومەندەدى. كەدەندىك تەكسەرۋلەردىڭ تيىمدىلىگى ارتىپ، قوسىمشا 25 ميلليارد تەڭگە تۇسىرۋگە مۇمكىندىك بەردى. اكىمشىلەندىرۋ پروتسەستەرىن اۆتوماتتاندىرۋ جانە ادامي فاكتوردى بولدىرماۋ ماقساتىندا «ەكسپورتتىق باقىلاۋ» مودۋلى ىسكە قوسىلدى جانە ناۆيگاتسيالىق پلومبالاردى پايدالانۋ باستالدى.
وسىعان بايلانىستى ەۋرازيالىق ەكونوميكالىق وداق ەلدەرىنەن قوسىلعان قۇن سالىعى 12,2 ميلليارد تەڭگەگە ءوستى جانە ءبىرىنشى رەت ءۇشىنشى ەلدەردەن كەلەتىن يمپورتتان تۇسكەن تۇسىمنەن 34 ميلليارد تەڭگەگە اسىپ ءتۇستى»، - دەدى ەرۇلان جاماۋبايەۆ.