مينيستر ازىق-تۇلىك تاۋارلارى باعاسىن 45 پايىزعا دەيىن تومەندەتۋ مۇمكىندىگى تۋرالى ايتتى
«تۇتاس ءارى ءتيىمدى ساۋدا- لوگيستيكالىق ينفراقۇرىلىمدى قالىپتاستىرۋ ءۇشىن ۇلتتىق تاۋار وتكىزۋشى جۇيە قۇرىلۋدا. ول فەرمەرلەردى، ساتىپ الۋشىلاردى، كولىك قىزمەتكەرلەرىن، دەلدال مەن ريتەيلەردى ءبىرىڭعاي كلاستەرگە بىرىكتىرەدى. ياعني تەحنيكالىق ءارى اقپاراتتىق تۇرعىدا قامتيدى»، - دەدى مينيستر ونلاين رەجيمدە حالىق الدىندا ەسەپ بەرۋى بارىسىندا.
ونىڭ ايتۋىنشا، ءبىرىڭعاي سيفرلىق جۇيەمەن بىرىكتىرىلگەن 24 كوتەرمە-ۇلەستىرۋ ورتالىعى ءونىمدى جەتكىزۋ تىزبەگىن وڭتايلاندىرادى. وسى ورايدا وندىرۋشىدەن تۇتىنۋشىعا دەيىن جەتكىزۋدى قامتىپ، ءونىمدى ساقتاۋعا، ءتيىمدى بولۋگە قولايلى جاعداي جاسالادى. تاۋاردىڭ ءبۇلىنۋ ءقاۋپىن تومەندەتۋ شارالارى فەرمەرلەرگە ونىمدىلىكتى ارتتىرۋ ءۇشىن قوسىمشا ينۆەستيتسيا بولۋگە جول اشادى.
«سونىمەن بىرگە، جەكە ءوندىرۋشىنىڭ تاۋاردى وتكىزۋ نارىعىنا تىكەلەي قول جەتكىزۋى تابىسىن ەلەۋلى سومادا ارتتىرادى. ال تۇتىنۋشى ساپالى ءارى ءقاۋىپسىز ءونىمدى الادى. بۇل تۇرعىدا الەۋمەتتىك ماڭىزداعى ازىق-تۇلىك تاۋارلارى باعاسىن 45 پايىزعا دەيىن تومەندەتۋگە مۇمكىن بولادى. وسى ورايدا تۇتىنۋشىلار ءۇشىن جىلىنا 60 ميلليارد تەڭگە شاماسىندا ۇنەمدەۋگە ىقپال ەتەدى. ۇلتتىق تاۋار وتكىزۋ جۇيەسى باعا تۇراقتىلىعىن قامتاماسىز ەتىپ، ماۋسىمدىق تاپشىلىقتى جوياتىنىن اتاپ وتكەن ءجون»، - دەدى سۇلتانوۆ.
