كوروناۆيرۋس: ءساۋىر ايىندا 45 مىڭ مەديتسينا قىزمەتكەرى ۇستەمەاقى الادى

بۇل تۋرالى «الەۋمەتتىك مەديتسينالىق ساقتاندىرۋ قورى» ك ە ا ق باسقارما ءتوراعاسىنىڭ ورىنباسارى مارات شورانوۆ ءمالىم ەتتى، دەپ حابارلايدى قازاقپارات.

«جالپى، كوروناۆيرۋسپەن كۇرەس شارالارىنا 56 ميلليارد تەڭگە شاماسىندا قارجى ءبولىندى. سونىڭ ىشىندە 14,7 ميلليارد تەڭگە ينفەكتسيالىق، كارانتيندىك جانە پروۆيزورلىق ستاتسيوناردا جاتقان ناۋقاستارعا ارنالعان. 5,4 ميلليارد تەڭگە تەستىلەرگە، ينفەكسيالىق ءارى پروۆيزورلىق ەمحانالاردا جاسالاتىن اناليزدەرگە ءبولىندى. سونىمەن قاتار، 36 ميلليارد تەڭگە دارىگەرلەرىمىز ەڭبەكاقىسىنا قوسىمشا تولەم بەرۋ ءۇشىن ارنالعان»،- دەپ توقتالدى م. شورانوۆ ونلاين باسپا ءسوز ءماسليحاتىندا.

ونىڭ سوزىنە قاراعاندا، ەل وڭىرلەرىندە ەپيدەميولوگيالىق جاعداي ءارتۇرلى بولدى. وڭىرلەردەگى العاشقى ناۋقاستار ناۋرىز ايىنىڭ سوڭىنا قاراي انىقتالا باستادى. سايكەسىنشە، ناۋرىز ايىندا جۇمىلدىرىلعان مەديتسينالىق قىزمەتكەرلەر ءساۋىر ايىمەن سالىستارعاندا ايتارلىقتاي از بولدى.

«اسىرەسە، بۇل جاعداي نۇر- سۇلتان مەن الماتى قالالارىندا قيىنداۋ بولدى. جالپى، ەلىمىز بويىنشا ناۋرىز ايىندا 17700 مەديتسينا قىزمەتكەرى ۇستەمەاقى الدى. تولەمنىڭ جالپى سوماسى 3,4 ميلليارد تەڭگەنى قۇرادى. الايدا، ەپيدەميولوگيالىق جاعداي ءساۋىر ايىنىڭ باسىندا ۋشىعا ءتۇستى، وسى ورايدا جۇمىلدىرىلعان قىزمەتكەرلەر سانى دا ارتتى. بۇل تۇرعىدا ەلىمىزدىڭ ءار وڭىرىنەن الدىن الا مالىمەتتەر بەرىلدى. ءساۋىر ايىندا ۇستەمەاقى الۋعا ۇمىتكەر مەديتسينالىق قىزمەتكەرلەرلەر سانى 45 مىڭ ادامعا جەتتى، ياعني ولاردىڭ سانى ناۋرىز ايىنا قاراعاندا ءۇش ەسەگە جۋىق ارتتى»، - دەدى م. شورانوۆ.

ونىڭ ايتۋىنشا، الداعى كۇندەرى وڭىرلىك كوميسسيالار ءتيىستى جۇمىستاردى اياقتاپ، الەۋمەتتىك مەديتسينالىق ساقتاندىرۋ قورىنا تىزىمدەردى جىبەرەدى.

«ءبىز ءوز كەزەگىمىزدە قارجىنى ءار مەديتسينالىق ۇيىمعا، نەگىزگى جەتكىزۋشىلەرگە بولەمىز. ال مەديتسينالىق قىزمەتكەرلەردىڭ شوتىنا اقشانى اۋدارۋ شارالارى بىزبەن شارتقا وتىرعان مەديتسينالىق ۇيىمداردىڭ مىندەتى»، - دەدى ول. وسى ورايدا مارات شورانوۆ ءساۋىر ايىندا جۇمىس ىستەگەن 45 مىڭ ادامعا شامامەن 14,7 ميلليارد تەڭگە ءبولىنۋى مۇمكىن ەكەندىگىن جەتكىزدى.