قىمبات جيپ مىنەتىن پاۆلودارلىقتار مەملەكەتكە 45 ميلليون تەڭگە قارىز
قالالىق مەملەكەتتىك كىرىس باسقارماسى جەرگىلىكتى پوليتسيا قىزمەتىمەن بىرلەسە سالىق تولەۋدەن جالتارىپ، بەرەشەگى جينالىپ قالعان اۆتوكولىك يەلەرىن انىقتاۋ بويىنشا رەيد وتكىزدى.
ولاردىڭ كوبىسى ءۇش مىڭ تەكشە سانتيمەتر كولەمنەن ۇلكەن قوزعالتقىشى بار قىمبات كروسسوۆەرلەر بولىپ شىقتى. مۇنداي كولىكتەردىڭ 200 ءى قازىرگى كەزدە شاھار كوشەلەرىندە جۇيتكىپ ءجۇر. قالالىق مەملەكەتتىك كىرىس باسقارماسى جەكە تۇلعالاردىڭ اقپاراتىن قابىلداۋ جانە وڭدەۋ ورتالىعى ءبولىمىنىڭ باسشىسى ماقسۇت قاڭتاربايەۆ سالىق تولەۋدى ۋاقتىلى جانە ەرىكتى تۇردە جۇزەگە اسىرۋعا شاقىردى.
«قارىزى بار ازاماتتاردىڭ كوبى قوزعالتقىش كولەمى ۇلكەن كولىكتەرى بار اۆتوكولىك يەلەرى ەكەندىگىن انىقتادىق»، - دەيدى ماقسۇت قاڭتاربايەۆ. - ونداي كولىك يەلەرىنىڭ جالپى مەملەكەتكە بەرەشەگى 45 ميلليون تەڭگەدەن اسىپ كەتتى. وسى سومالار قالا بيۋجەتىنە قۇيىلۋى ءتيىس. سول سەبەپتى ازاماتتارىمىزدى سالىق بويىنشا قارىزدارىن ءوز ەركىمەن تولەۋگە شاقىرامىز. ءوز مىندەتتەرىن وتەۋدەن جالتاراتىن سالىق تولەۋشىلەردى نە كۇتەتىنىن رەيد كورسەتتى. سالىقشىلار پوليتسەيلەرمەن بىرلەسە شاھار كوشەلەرىمەن ءوتىپ بارا جاتقان جيپتەردى توقتاتىپ، سول جەردە مالىمەتتەر بازاسىنان ولاردىڭ سالىق تولەگەن-تولەمەگەندەرىن انىقتادى. ناتيجەسىندە Lexus LX4700 كولىگى يەسىنىڭ سالىق تولەمەگەنى بەلگىلى بولدى.
جيپ يەسى ەكى جىل ىشىندە مەملەكەتكە 650 مىڭ تەڭگە كولەمىندە سالىق تولەمەي كەلگەن. اۆتوموبيلدىڭ ەكى جاعىنا «سالىق تولەمەگەنى ءۇشىن ايىپ تۇراعىنا كىرگىزىلەدى» دەگەن باننەر ورناتىلدى.