مالايزيانىڭ ەكس-پرەمەرى 45 جىلعا باس بوستاندىعىنان ايىرىلۋى مۇمكىن

استانا. قازاقپارات - مالايزيا سوتى ەلدىڭ بۇرىنعى پرەمەرى نادجيب رازاكقا اقشانى جىلىستاتۋمەن جانە تەرروريزمدى قارجىلاندىرۋمەن كۇرەس تۋرالى زاڭدى بۇزدى دەگەن ايىپ تاقتى.

سونداي-اق ول زاڭسىز جولمەن تابىسقا كەنەلىپ، مەملەكەتتىك SRC International قورىنىڭ 10 ميلليون دوللاردان استام قارجىسىن جاراتقان، دەپ حابارلايدى euronews.com.

بۇل قاراجات رازاكتىڭ جەكە شوتىنا اۋدارىلعان. بۇدان باسقا سوت القاسى مەملەكەتتىك ايىپتاۋشىنىڭ ءىستى جوعارعى سوتقا بەرۋ تۋرالى تالابىن ماقۇلدادى. ال بۇرىنعى پرەمەر ءوزىنىڭ جازىقسىز ەكەندىگىن ءمالىم ەتتى.

ەگەر وعان ءۇش قىلمىستىق ءىس بويىنشا ايىپتاۋ ۇكىمى شىعارىلاتىن بولسا، رازاك 45 جىلعا باس بوستاندىعىنان ايىرىلادى.

ەسكە سالا كەتسەك، بۇرىنعى پرەمەردى شىلدەنىڭ باسىندا قۇقىق قورعاۋ ورگاندارى بيلىكتى اسىرا پايدالانعانى ءۇشىن ۇستاعان بولاتىن.

ءبىراق سوت ونىڭ قورعاۋشىلارىنىڭ ءوتىنىشىن قاناعاتتاندىرىپ، ەكس-پرەمەردى كەپىلمەن بوساتقان ەدى.