باتىس قازاقستانعا ءبىر جىلدا 45 ورالمان وتباسى كوشىپ كەلدى

وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى قاليار ايتمۇحامبەتوۆتىڭ ايتۋىنشا، وسىلايشا، وڭىرگە قونىس اۋدارعان 68 قازاققا ورالمان مارتەبەسى بەرىلدى.

ق ر ۇكىمەتىنىڭ قاۋلىسىنا سايكەس ورالماندار مەن قونىس اۋدارۋشىلاردى قابىلداۋدىڭ وڭىرلىك كۆوتاسى بەكىتىلىپ، وعان اقمولا، قوستاناي، پاۆلودار، شىعىس قازاقستان، سولتۇستىك قازاقستان وبلىستارى ەنگىزىلگەن. ب ق و بۇل وڭىرلىك كۆوتاعا ىلىكپەگەنمەن، اق جايىققا ورالمانداردىڭ كەلۋ لەگى توقتامايدى، الداعى ۋاقىتتا دا جالعاسا بەرەدى.

باتىس قازاقستان وبلىسى اتاجۇرتقا ورالعان وتباسىلاردى 1993-جىلدان قابىلداي باستادى. شيرەك عاسىرعا جۋىق ۋاقىت ىشىندە وبلىسقا 3944 ورالمان وتباسى نەمەسە 17706 ادام كوشىپ كەلدى. سونىڭ باسىم بولىگى وزبەكستان (2461 وتباسى، 13735 ادام) مەن رەسەي فەدەراتسياسىنان (1283 وتباسى، 3484 ادام).

قازىرگى تاڭدا اتامەكەنگە كەلگەن وتانداستارىمىز ۇرپاق ءوربىتىپ، ەل قاتارلى ءومىر سۇرۋدە. ولاردىڭ اراسىندا ءوز كاسىبىن ورىستەتىپ وتىرعاندارى دا از ەمەس.

اۆتور: ەلجان ەرالى