تالدىقورعانداعى ءىلياس جانسۇگىروۆ اتىنداعى ۋنيۆەرسيتەتكە 45 جىل تولدى
وقۋ ورنىنىڭ ايتۋلى داتاسى شەڭبەرىندە عىلىمي- زەرتتەۋ ينستيتۋتى اشىلدى، دەپ حابارلايدى قازاقپارات ءتىلشىسى.
ج و و ۇجىمى مەن ستۋدەنتتەرىن مەرەيتويىمەن وبلىس اكىمى اماندىق باتالوۆ قۇتتىقتاپ، ۋنيۆەرسيتەت جانىنان قۇرىلعان عىلىمي- زەرتتەۋ ينستيتۋتىنىڭ اشىلۋىنا قاتىستى. ينستيتۋتتىڭ قۇرامىندا ەكى - بيوگەوتەحنولوگيا جانە اگروبيوتەحنولوگيا زەرتحانالارى بار. ولاردىڭ جۇمىسى تاۋ- كەن جانە اگرارلىق ونەركاسىپ سالالارىنا يننوۆاتسيالىق بيوتەحنولوگيالىق تاسىلدەردى ەنگىزۋگە نەگىزدەلەدى.
قازىرگى كەزدە ينستيتۋتتا دوكتورلار مەن عىلىم كانديداتتارىن قوسقاندا 9 قىزمەتكەر بار. زەرتتەۋ جۇمىستارىنا «بيولوگيا» جانە «ەكولوگيا» فاكۋلتەتتەرىندە وقيتىن ستۋدەنتتەر دە تارتىلادى. ينستيتۋت جۇمىسىمەن كەڭىنەن تانىسىپ، زەرتحانانى ارالاعان وبلىس باسشىسى وسىنداعى قىزمەتكەرلەردىڭ جۇمىسىنا تابىس تىلەپ، تىلەكتەستىگىن ءبىلدىردى. سونىمەن قاتار ولاردىڭ اگروبيوتەحنولوگيا سالاسىنداعى ەڭبەكتەرى بۇگىنگى كۇن ءۇشىن، اسىرەسە ءبىزدىڭ اگرو- يندۋستريالدى وبلىسىمىز ءۇشىن جانە اۋىل شارۋاشىلىعىنا يننوۆاتسيالاردى ەنگىزۋ جۇمىسى اتقارىلىپ جاتقان شاقتا اسا ماڭىزدى سانالاتىنىن اتاپ ءوتتى.
مۇنان سوڭ اماندىق باتالوۆ ج و و- نىڭ 45 جىلدىعىنا ارنالعان سالتاناتتى شاراعا قاتىسىپ، قۇتتىقتاۋ تىلەگىن جەتكىزدى. «قازاق پوەزياسىنىڭ قۇلاگەرى ءىلياس جانسۇگىروۆتىڭ اتىمەن اتالعان ۋنيۆەرسيتەت جارتى عاسىرعا جاقىن ۋاقىت ىشىندە وتاندىق ءبىلىم جۇيەسىندە ءوز ورنى مەن ءداستۇرى بار ءبىلىم ورداسىنا اينالدى. ۋنيۆەرسيتەت تۇلەكتەرى ءوڭىرىمىزدىڭ ەكونوميكاسىنىڭ ءار سالاسىندا ەڭبەك ەتىپ ءجۇر. اسىرەسە، پەداگوگ مامانداردىڭ 90 پايىزعا جۋىعى - جەتىسۋ مەملەكەتتىك ۋنيۆەرسيتەتى دايارلاعان كادرلار. تاۋەلسىزدىكتىڭ العاشقى جىلدارىندا پرەزيدەنتىمىز نۇرسۇلتان ءابىش ۇلى نازاربايەۆتىڭ ۋنيۆەرسيتەتكە ارنايى كەلىپ، دامۋدىڭ باستى باعىتتارىن ايقىنداپ بەرۋى وقۋ ورنىنىڭ وركەندەۋىنە تىكەلەي اسەر ەتتى. ەلباسىمىزدىڭ جوعارى ءبىلىم بەرۋ جۇيەسىن دامىتۋ جونىندەگى تاپسىرمالارىنا وراي، بۇگىنگى تاڭدا ۋنيۆەرسيتەتتە زامان تالابىنا ساي جاس بۋىندى وقىتىپ، تاربيەلەۋ جاقسى جولعا قويىلعان. جەتىسۋدىڭ باستى ءبىلىم ورداسىندا وقىعان جاستارىمىز وبلىستىڭ، ەلىمىزدىڭ ابىرويىن اسىرا بەرسىن! ۋنيۆەرسيتەت ۇجىمىنا مول تابىس تىلەيمىن!»، - دەدى ا. باتالوۆ.
ءبىلىم ورداسىندا وبلىس اكىمىنىڭ گرانتىمەن ءبىلىم الىپ جاتقان ستۋدەنتتەر وقۋىن وقۋ جىلىنىڭ سوڭىنا دەيىن اياقتاۋى ءۇشىن 35 ميلليون تەڭگەنىڭ سەرتيفيكاتىن تابىستادى. سونىمەن قاتار وبلىس اكىمى ۋنيۆەرسيتەت رەكتورى قۋات بايمىرزايەۆقا وبلىس اكىمىنىڭ العىس حاتىن جانە ءبىلىم ورداسىنىڭ ءبىرقاتار قىزمەتكەرلەرىنە قۇرمەت گراموتالارىن تاپسىردى. شارا بارىسىندا اماندىق باتالوۆقا «قۇرمەتتى پروفەسسور» اتاعى بەرىلدى. سالتاناتقا ءىلياس جانسۇگىروۆتىڭ ۇلى سايات جانسۇگىروۆ ارنايى قاتىستى.
جيىن ۋنيۆەرسيتەت تۇلەكتەرىنىڭ، وقىتۋشىلارىنىڭ، ستۋدەنتتەر مەن قوناقتاردىڭ ىزگى تىلەكتەرىمەن جالعاستى. جالپى، ءى. جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىن قۇرىلعاننان بەرى 49000 تۇلەك بىتىرگەن. ولاردىڭ 35 مىڭى - پەداگوگيكالىق ماماندىقتار بويىنشا ءتامامداعان. تۇلەكتەر اراسىندا عارىشكەر- سىناقشى، اۆياتسيا گەنەرال- مايورى، «حالىق قاھارمانى» ايدىن ايىمبەتوۆ، اتلانتاداعى وليمپيادا ويىندارىنىڭ جۇلدەگەرى، قولا مەدال يەگەرى ماۋلەن مامىروۆ تا بار. بۇگىنگى كۇنى ۋنيۆەرسيتەتتە 6 مىڭ ستۋدەنت وقيدى. ولاردىڭ ىشىندە 40-ى ماماندىق بويىنشا - باكالاۆر، 21- ءى - ماگيستر، 6-ۋى - دوكتورانتتار. بيىلعى جىلى ۋنيۆەرسيتەت تۇڭعىش رەت ەۋروپا مەن ورتا ازيانىڭ دامۋشى ۇزدىك جوعارى وقۋ ورىندارىنىڭ ارنايى رەيتينگىندە الدىڭعى قاتارداعى 300-دىكتىڭ ىشىنە كىردى. ال ۇلتتىق رەيتينگ بويىنشا كوپسالالى ج و و 12- ورىندا.
اۆتور: سامال قابىشيەۆا
