ا ق ش بيلىگى فەرما سالۋ ءۇشىن 45 مىڭ جابايى جىلقىنىڭ كوزىن جويماقشى

استانا. قازاقپارات - ا ق ش بيلىگى جايىلىم جەرلەردى تازارتىپ، ول جەرلەرگە فەرمالار سالۋ ءۇشىن جايىلىپ جۇرگەن جابايى 45 مىڭ جىلقىنى ءولتىرۋدى جوسپارلاپ وتىر.

بۇل تۋرالى The Independent باسىلىمىنا سىلتەمە جاساپ Skifnews.kz پورتالى حابارلاپ وتىر.

باسىلىمنىڭ مالىمەتىنشە، امەريكا قۇراما شتاتتارىنىڭ اۋماعىندا بار- جوعى 50 مىڭداي جابايى جىلقى بار. ولاردىڭ 45 مىڭىن ولتىرسە قورشاعان ورتاعا ايتارلىقتاي زالال كەلەدى دەيدى امەريكالىق ساراپشىلار.

جىلقىلاردىڭ كوزىن جويۋ جەكە كاسىپكەرلەردىڭ قولىمەن جۇرگىزىلەدى. ءبىراق، بۇل ءىستىڭ ناقتى قاشان جانە قانداي جولمەن جۇزەگە اساتىنى ايتىلماي وتىر.

قازىرگى تاڭدا جان- جانۋارلاردى قورعاۋ ۇيىمدارى بيلىكتىڭ بۇل باستاماسىنا قارسىلىق ءبىلدىرىپ، نارازىلىقتار ۇيىمداستىرۋدا. ولار Change.org پورتالى ارقىلى قارسىلىق جاريالادى. وعان قول قويعاندار سانى قازىرگە دەيىن 71 مىڭ ادامنان اسىپ كەتتى.