قىزىلوردا وبلىسىندا بالىق ونىمدەرىنىڭ ەكسپورتى 45 پايىزعا ارتتى - ق. كوشەربايەۆ
بۇل تۋرالى قىزىلوردا وبلىسىنىڭ اكىمى قىرىمبەك كوشەربايەۆ حالىق الدىندا ەسەپ بەرۋ كەزدەسۋىندە ايتتى.
قىزىلوردا وبلىسىندا سوڭعى 3 جىلدا بالىق اۋلاۋ 2 مىڭ تونناعا نەمەسە 30 پايىزعا كوبەيدى. 2015-جىلى جالپى اۋلانعان كولەم 8,4 مىڭ توننانى قۇرادى. سوڭعى ەكى جىلدا بالىق ونىمدەرىنىڭ ەكسپورتى 45 پايىزعا، ونىڭ ىشىندە ەۋرووداق ەلدەرىنە - 2 ەسەگە ءوستى.
ارالدىڭ بالىعى وسى كۇندە رەسەي، ۋكراينا، گرۋزيا، دانيا، پولشا، اۆستريا مەن گەرمانياعا ەكسپورتتالدى. 2015-جىلى قۇنى 4,6 ميلليون ا ق ش دوللارىن قۇرايتىن 867 توننا بالىق ەۋروپا ەلدەرىنە جانە قۇنى 202 مىڭ ا ق ش دوللارىن قۇرايتىن 920 توننا ءونىم رەسەيگە جونەلتىلگەن.
وبلىستا جىلدىق قۋاتتىلىعى 11 مىڭ توننا بولاتىن 8 بالىق وڭدەۋ زاۋىتى جۇمىس ىستەيدى. بۇل 300 دەن استام ادامدى تۇراقتى جۇمىسپەن قامتۋعا مۇمكىندىك بەرۋدە.
بارلىق كاسىپورىندار حالىقارالىق تالاپقا ساي قۇرالدارمەن جابدىقتالعان.
«بايقوڭىر» الەۋمەتتىك-كاسىپكەرلىك كورپوراتسياسى تاراپىنان بۇل سالاعا جاقسى قولداۋ كورسەتىلىپ وتىر. وتكەن جىلى، مەملەكەتتىك-جەكەشەلىك ارىپتەستىك نەگىزىندە، الەۋمەتتىك-كاسىپكەرلىك كورپوراتسياسى بالىق ءوندىرۋ، وڭدەۋ جانە ءونىمدى وتكىزۋگە ارنالعان بىرنەشە جوباعا ەنشىلەس مەكەمە رەتىندە اتسالىستى. جوبالاردى ىسكە اسىرۋشى نەگىزگى كاسىپورىننىڭ «قاناتى قاتايعاننان كەيىن» الەۋمەتتىك-كاسىپكەرلىك كورپوراتسياسى ءوز ۇلەسىن ارىپتەس كاسىپورىنعا قايتارىپ بەرەدى. قازىر الەۋمەتتىك- كاسىپكەرلىك كورپوراتسياسى وسى سالاداعى تاعى بىرنەشە جوبالار بويىنشا، اتاپ ايتساق، يىركول شارۋاشىلىعى توعانىن قالپىنا كەلتىرۋ جانە ارال بالىق وڭدەۋ زاۋىتىنىڭ جۇمىسىن جەتىلدىرۋگە اتسالىسۋدا»، - دەدى قىزىلوردا وبلىسىنىڭ اكىمى قىرىمبەك كوشەربايەۆ حالىق الدىنداعى ەسەپتى كەزدەسۋىندە.
ارال قالاسىنداعى قۋاتتىلىعى جىلىنا 6 مىڭ توننا بالىق وڭدەيتىن ارال بالىق وڭدەۋ زاۋىتى قىزمەتىن كەڭەيتىپ، جۇمىستارىن جۇرگىزۋدە. زاۋىتتى شيكىزاتپەن تۇراقتى قامتاماسىز ەتۋ ءۇشىن ارال اۋدانىندا قاراشالاڭ بالىق سەرۆيستىك-دايىنداۋ ورتالىعىنىڭ قۇرىلىسى اياقتالدى.
وتكەن جىلدىڭ شىلدەسىندە سوڭعى 50 جىلدا تۇڭعىش رەت ارال ءوڭىرى بالىقشىلارىنىڭ ءبىرىنشى سلەتى ءوتتى.
