باس باپكەرلەردىڭ ايلىعىن 450 مىڭ تەڭگەگە دەيىن كوتەردىك - اندرەي كريۋكوۆ
«2018 -جىلى حالىقارالىق ساناتتاعى جانە سپورتتىق رەزەرۆتەگى سپورتشىلاردى، وليمپيادالىق سپورت تۇرلەرى بويىنشا ۇلتتىق قۇراما مۇشەلەرىن حالىقارالىق جارىستارعا دايىنداۋ تۋرالى مەملەكەتتىك تاپسىرما بەرىلدى. بۇل تاپسىرمانى ىسكە اسىرۋدى قىزمەتكەرلەردىڭ اۋىسۋىنان باستادىق. ياعني مادەنيەت جانە سپورت مينيسترىلىگىنە باعىنىشتى ۇيىمدار ۇلتتىق وليمپيادا كوميتەتىنىڭ قۇرىلىمىنا ءوتتى. مەملەكەتتىك تاپسىرمانى ورىنداۋعا بارلىعى 72 ادام تارتىلدى. ۇلتتىق وليمپيادا كوميتەتى وسى مەملەكەتتىك تاپسىرمانى ورىندايتىن اكىمشىلىك- باسقارۋ اپپاراتى قىزمەتكەرلەرىنىڭ ايلىق قورىنىڭ 42 پايىزىن ءوز قاراجاتى ەسەبىنەن تولەپ وتىر. سپورتشىلار مەن باپكەرلەرگە تولەنەتىن اقشا ايتارلىقتاي كوتەرىلدى. بۇعان دەيىن باس باپكەرلەردىڭ ورتاشا ەڭبەكاقىسى 180 مىڭ تەڭگەدەن اسپايتىن. 2019 -جىلدان باستاپ باس باپكەرلەردىڭ ايلىعى 450 مىڭ تەڭگەگە دەيىن كوتەرىلدى»، - دەدى كوميتەتتىڭ حاتشىسى.
سونداي- اق، ول وليمپيادا ويىندارىنا جولداما ۇتىپ الىنعان سپورت تۇرلەرى بويىنشا سپورتشىلار مەن باپكەرلەردىڭ ايلىعى ايتارلىقتاي وسكەنىن اتادى.
«2018 -جىلدان باستاپ وڭىرلەردىڭ بارىندە ماتەريالدىق- تەحنيكالىق بازانى تۇگەندەۋ جۇرگىزىلدى. ماماندار وڭىرلەردىڭ ءبارىن ارالاپ شىقتى. قورىتىندىسى بويىنشا قالىپتاسقان پروبلەمالاردى جەرگىلىكتى دەڭگەيدە شەشۋ ۇسىنىلدى. سونداي- اق، ەلىمىز بويىنشا 60-تان استام جاڭا سپورت نىسانى اككرەديتتەلدى»، - دەدى اندرەي كريۋكوۆ.
اۆتور: ەسىمجان ناقتىباي
