قارت كاسپييدەن ءور التايعا: ۆەلوساياحاتشى 4500 شاقىرىمدى ءجۇرىپ ءوتتى
بەينەۋ اۋدانىنىڭ تۋماسى، قازاقستاننىڭ قۇرمەتتى قۇرىلىسشىسى، كاسىپكەر، مەتسەنات راببيم بوراشوۆتىڭ قارت كاسپيدەن ءور التايعا دەيىنگى ۆەلوساپارى اياقتالۋعا جاقىن، دەپ حابارلايدى قازاقپارات ءتىلشىسى.
«اقتاۋ - مۇزتاۋ» ۆەلوساپارىنىڭ نەگىزگى ماقساتى - اتالاردىڭ جۇرگەن جولىمەن، باسقان ىزىمەن ءجۇرىپ ءوتۋ. قازاقتىڭ ۇلانعايىر دالاسىن ۆەلوسيپەدپەن شارلاپ، جول جونەكەي كيەلى جەرلەر مەن ەلدەرگە سوعىپ، اققۋلى كولى مەن قاڭباقتى ءشولىن ءوز كوزىممەن كورۋ، سەزىنۋ ەدى. وسى ارقىلى ىشكى تۋريزمدى دامىتۋعا ۇلەس قوسىپ، قازاق دالاسىنىڭ كەرەمەتتەرىن الەمگە پاش ەتكىم كەلدى. بۇعان قوسا، سالاۋاتتى ءومىر سالتى مەن تاريحي مۇرالارىمىزدى ناسيحاتتاۋدى ءجون كوردىم. الشاق جاتقان ەلدى مەكەندەردى ورتالىققا تاس جولدارمەن بايلانىستىرۋدى، جاڭا ۇرپاققا جەرىمىزدىڭ كەڭدىگى مەن تاريحىمىزدىڭ بايلىعىن دارىپتەۋ سەكىلدى ميسسيالاردان تۇرادى»، - دەيدى راببيم بوراشوۆ.
ۆەلوساياحاتشى بۇل ساپارىن 2020-جىلى باستاعان بولاتىن. كيەلى ماڭعىستاۋدان باستالعان ساپار شالقار ەلدى مەكەنى ارقىلى تورعاي دالاسىنا، اتباسار ارقىلى 2021-جىلى نۇر-سۇلتان قالاسىنا جەتىپ توقتاعان.
بيىل ماۋسىمنان قايتا جالعاستىرعان ول نۇر-سۇلتاننان قاراعاندى-قارقارالى ارقىلى اباي مەن شاكارىم تاريحي-مەموريالدى كەشەنىنە سوعىپ، جاڭا وبلىس ورتالىعى سەمەي قالاسىندا توقتادى. سودان سوڭ وسكەمەن-قاتون-قاراعاي باعىتىمەن بەرەل قورعانى ارقىلى قاراقولگە جەتتى.
ساياحاتشى 4500 شاقىرىمدى ارتقا تاستاپ، ساپاردىڭ سوڭعى مارەسى - ءور التايدىڭ مۇزتاۋىنا دا تايادى. الدا 40 شاقىرىمداي جول قالدى. راببيم بوراشوۆ ول جولدى اتپەن ءجۇرۋدى جوسپارلاپ وتىر.
