450 بالا ۋلاندى: 3 دارىگەر قاماۋعا الىندى
وزبەكستاندا «انتيسترۋمين» يود پرەپاراتىن قابىلداپ، جاپپاي ۋلانعان بالالارعا قاتىستى قىلمىستىق ءىس بويىنشا ءۇش دارىگەر ۇستالدى، دەپ حابارلايدى Kazinform مەنشىكتى ءتىلشىسى.
وزبەكستان جوعارعى سوتىنىڭ باسپا ءسوز قىزمەتىنەن ءمالىم ەتكەندەي، تاشكەنتتىڭ ياشناباد اۋداندىق قىلمىستىق سوتىنىڭ شەشىمىنە ساي ءۇش كۇدىكتى قاماۋعا الىندى. ولاردىڭ قاتارىندا مامانداندىرىلعان رەسپۋبليكالىق عىلىمي-پراكتيكالىق مەديتسينالىق ەندوكرينولوگيا ورتالىعى ديرەكتورىنىڭ ورىنباسارى جانە دەنساۋلىق ساقتاۋ مينيسترلىگىنىڭ ەكى قىزمەتكەرى بار.
ايتا كەتەيىك، بيىل 20- قىركۇيەكتەن باستاپ بارلىق مەكتەپتەر مەن بالاباقشالارداعى بۇلدىرشىندەر اراسىندا يود تاپشىلىعىن بولدىرماۋعا باعىتتالعان جاڭا باعدارلاما قولعا الىندى. ياعني، اپتا سايىن بالالارعا پروفيلاكتيكالىق دوزادا جەرگىلىكتى جەردە وندىرىلگەن «انتيسترۋم» يود تابلەتكالارى بەرىلە باستادى.
كەيىن دەنساۋلىق ساقتاۋ مينيسترلىگى نامانگان وبلىسىندا ۋلانۋ بەلگىلەرى بار 450 بالا اۋرۋحاناعا جاتقىزىلعانىن ءمالىم ەتتى. ولاردا جوعارى دەنە قىزۋى، باس اۋىرۋى، كەيبىرىندە جۇرەك اينۋ مەن قۇسۋ سيمپتومدارى بايقالعان. قاراشا ايىندا جاۋاپتى ۆەدومستۆو ۋلانۋدىڭ سەبەبى «انتيسترۋمين» جەرگىلىكتى پرەپاراتىنىڭ ارتىق دوزالانۋىنان بولعانىن مويىندادى.
