قىزىلاعاشتاعى 45 ادامنىڭ ءومىرىن جالماعان سۋ قويماسىن جوندەۋگە ۇكىمەت 50 ميلليون تەڭگە ءبولدى
بۇل تۋرالى بۇگىن قازاقپارات ءتىلشىسىنىڭ سۇراعىنا جاۋاپ بەرە وتىرىپ، اۋىل شارۋاشىلىعى مينيسترلىگىندە وتكەن باسپا ءسوز ءماسليحاتىندا مينيسترلىكتىڭ سۋ رەسۋرستارى كوميتەتى سۋ شارۋاشىلىق مەكەمەلەرىن دامىتۋ جانە پايدالانۋعا بەرۋ باسقارماسىنىڭ جەتەكشىسى مۇرات بەيسەنوۆ ءمالىم ەتتى.
« قىزىلاعاش سۋ قويماسىنا كەلەتىن بولساق، قۋانىشىمىزعا وراي، بيىل ق ر ۇكىمەتى ۇلكەن قولداۋ كورسەتىپ، 45 اپاتتى سۋ قويمانىڭ 15 ءىن جوندەۋگە قارجى ءبولۋ تۋرالى شەشىم قابىلدادى. ەلىمىزدە 45 اپاتتى سۋ قويماسى بار، ونىڭ 34 ءى رەسپۋبليكالىق مەنشىكتە. بيىل 11 - قىركۇيەكتە وتكەن رەسپۋبليكالىق بيۋدجەتتىك كوميسسيانىڭ وتىرىسىندا 15 سۋ قويمانى كۇردەلى جوندەۋدەن وتكىزۋ ءۇشىن 710 ملن تەڭگە ماقۇلداندى. 710 ميلليون تەڭگەنىڭ 50 ميلليونى قىزىلاعاش سۋ قويماسىنا ءبولىندى. قالعان قاراجات 2017-2018 -جىلدارى بولىنەدى» ، - دەپ حابارلادى م. بەيسەنوۆ.
قىزىلاعاش سۋ قويماسىنىڭ اتى قازاقستاندا قايعىلى وقيعامەن قاتار جۇرەدى. 2010 -جىلدىڭ 11 - ناۋرىزىنان 12 - ناۋرىزىنا قاراعان ءتۇنى قىزىلاعاش سۋ قويماسىنداعى بوگەت بۇزىلىپ، قىزىلاعاش اۋىلىن شايىپ كەتكەن ەدى. ۇكىمەت رەسمي تۇردە 45 ادامنىڭ قازا بولعانىن حابارلادى. 146 ءۇي تولىعىمەن شايىلىپ كەتكەن، 251 ءۇي قيراعان، شىعىن بولعان مال باسىندا ەسەپ جوق ەدى. جالپى، ارناسىنان اسقان قىزىلاعاش سۋ قويماسىنىڭ سۋى 18 مينۋتتىڭ ىشىندە ءوز جولىنداعىنىڭ بارلىعىن شايىپ كەتكەن. ارتىنشا، الماتى وبلىسىنىڭ پروكۋراتۋراسى اقسۋ اۋدانىنىڭ قىزىلاعاش اۋىلىندا ادام ولىمىنە اكەلگەن توتەنشە وقيعا بويىنشا قىلمىستىق ءىس قوزعادى. ىشكى ىستەر مينيسترلىگىنىڭ باسپا ءسوز قىزمەتىنەن حابارلاعانداي، جۇرگىزىلگەن ارنايى شارالاردىڭ بارىسىندا قىزىلاعاش سەلولىق وكرۋگىنىڭ اكىمى ە. ءجۇنىسوۆ، الماتى وبلىسى بويىنشا توتەنشە جاعدايلار دەپارتامەنتى باستىعىنىڭ ورىنباسارى ە. ەنين، اقسۋ اۋدانى توتەنشە جاعدايلار ءبولىمىنىڭ باستىعى ق. بايزاقوۆ، «شىنار» ج ش س- ءىنىڭ ديرەكتورى جانە قۇرىلتايشىسى ك. بەكەيەۆ، سۋدى پايدالانۋشىلاردىڭ ارنايى وندىرىستىك كووپەراتيۆىنىڭ اتقارۋشى ديرەكتورى م. ءجۇنىسوۆ ۋاقىتشا وقشاۋلاۋ اباقتىسىنا جابىلدى. تالدىقورعان گارنيزونىنىڭ اسكەري سوتى وسى قايعىلى وقيعاعا بايلانىستى سۋ بوگەتىنىڭ يەسى، « قىزىلاعاش» كووپەراتيۆىنىڭ باسقارما ءتوراعاسى قۋانىش بەكەيەۆ، قىزىلاعاش اۋىلدىق وكرۋگىنىڭ بۇرىنعى اكىمى ەسەت ءجۇنىسوۆ پەن ونىڭ ءىنىسى، « قىزىلاعاش» كووپەراتيۆىنىڭ ديرەكتورى مۇحيت ءجۇنىسوۆ بەس جىلعا سوتتالعان بولاتىن. اقسۋ اۋداندىق توتەنشە جاعدايلار جونىندەگى ءبولىمنىڭ باستىعى كۇنىبەك بايزاقوۆ شارتتى تۇردە ءۇش جىلعا سوتتالسا، سوت الماتى وبلىسى توتەنشە جاعدايلار دەپارتامەنتى باستىعىنىڭ بۇرىنعى ورىنباسارى ەۆگەني ەنيندى، الماتى وبلىسى سۋ رەسۋرستارى كوميتەتىنىڭ بۇرىنعى ءتوراعاسى اقداربەك سابىروۆتى، اقسۋ اۋدانى اكىمىنىڭ ورىنباسارى بەرىك تىنىشبايەۆتى اقتاعان بولاتىن.
اۆتور: كەنجەكەي توقتامۇرات قىزى
