ەلوردادا پوليتسيا تۇندە اتا-اناسىز جۇرگەن 44 بالانى انىقتاعان
نۇر-سۇلتان. قازاقپارات - ەلوردانىڭ ءتارتىپ ساقشىلارى كەي بالالار تۇندە ۇيىندە بولماي، سىرتتا قىدىرىپ جۇرەتىنىنە الاڭداۋشىلىق ءبىلدىرىپ وتىر.
وسىعان بايلانىستى قالالىق پوليتسيا دەپارتامەنتى اتا- انالارعا ەسكەرتۋ جاسادى، دەپ حابارلايدى قازاقپارات ءتىلشىسى ۆەدومستۆونىڭ باسپا ءسوز قىزمەتىنە سىلتەمە جاساپ.
قازىرگى ۋاقىتتا جاسوسپىرىمدەر ىستەرى جونىندەگى پوليتسيا قىزمەتكەرلەرى قالا ىشىندە رەيد جۇرگىزىپ جاتىر. تاياۋ كۇندەرى جۇرگىزىلگەن رەيد بارىسىندا پوليتسيا قىزمەتكەرلەرى تۇندە اتا- اناسىز جۇرگەن 44 بالانى انىقتاعان. بارلىق فاكت بويىنشا قۇقىق قورعاۋشىلار اكىمشىلىك كودەكستىڭ 442-بابى بويىنشا حاتتاما تولتىردى.
«ودان بولەك جاسوسپىرىمدەر ىستەرى جونىندەگى ينسپەكتورلار ەسەپتە تۇرعان اتا-انالاردىڭ ءۇيىن ارالاپ شىقتى. تۇرعىلىقتى ءۇيى بويىنشا 64 وتباسى تەكسەرىلىپ، پوليتسيا قىزمەتكەرلەرى بالا الدىنداعى مىندەتتەمەسىن ورىنداماعان اتا-انالارعا اكىمشىلىك كودەكستىڭ 127-بابى قولدانىلاتىنىن ەسكەرتتى. ءتۇسىندىرۋ جۇمىسىن جۇرگىزدى»، - دەلىنگەن حابارلامادا.
پوليتسيا دەپارتامەنتى اتا-انالارعا ساعات تۇنگى وننان كەيىن بالالار قاراۋسىز جۇرمەۋى كەرەكتىگىن ەسكەرتەدى. ەسكەرتۋدى ەلەمەگەن اتا-انالار اكىمشىلىك جازاعا تارتىلادى.
اۆتور: ايان بەكەن ۇلى
