قازاقستان سۋ رەسۋرستارىنىڭ 44 پايىزىن ترانسشەكارالىق وزەندەردەن الادى
سونىڭ ىشىندە قازاقستان دا بار، دەپ حابارلايدى قازاقپارات ءتىلشىسى.
قازاقستاننىڭ سۋ رەسۋرستارى جانە ەلدى سۋ قاۋىپسىزدىگىمەن قامتاماسىز ەتۋ ماسەلەسى بويىنشا سەناتتا بايانداما جاساعان قايرات قوجامجاروۆ الەمدىك رەسۋرستار ينستيتۋتىنىڭ زەرتتەۋى بويىنشا، سۋ جەتكىلىكسىز اۋماقتا بۇكىل الەمدە 2 ميلليارد ادام تۇرىپ جاتقانىن اتاپ ءوتتى.
«68 مەملەكەت سۋ تاپشىلىعىن ەرەكشە باستان كەشىرىپ وتىر. سونىڭ ىشىندە قازاقستان دا بار. گەوگرافيا ينستيتۋتى رەسپۋبليكانى سۋمەن قامتۋ دەڭگەيىنىڭ تومەندەپ بارا جاتقانىن حابارلايدى. ەگەر 1960-جىلدارى رەسپۋبليكادا سۋدىڭ جيىنتىق اعىنى 120 تەكشە شاقىرىمدى قۇراسا، قازىرگى ۋاقىتتا بۇل كورسەتكىش 101 گە دەيىن تومەندەگەن. 2020-جىلى وزەن اعىنى 80 گە دەيىن، ال 2030-جىلى تاعى دا 72 تەكشە شاقىرىمعا ازاياتىنى بولجانىپ وتىر. بۇعان قوسا حالىق پەن ەكونوميكانىڭ بارلىق سالاسىنىڭ سۋعا دەگەن سۇرانىسى ارتىپ بارادى»، - دەدى سەناتور.
قايرات قوجامجاروۆتىڭ ايتۋىنشا، بۇكىل الەمدىك بانك 2050-جىلى ايماقتاعى ەلدەردە سۋ تاپشىلىعى سالدارىنان جالپى ىشكى ءونىم 6 پايىزعا ازاياتىنىن بولجاعان.
«قازىرگى تاڭدا سۋ رەسۋرستارىنىڭ 55 پايىزىن عانا قازاقستان ءوز اۋماعىنان پايداعا جاراتىپ وتىر. قالعان 44 پايىزىن ترانسشەكارالىق وزەندەر ارقىلى الادى. مۇنداي جاعدايدا جەراستى سۋلارىنىڭ ماڭىزى ارتا تۇسەدى. وسىدان 350 جىل بۇرىن قازاقستانداعى جەر استى سۋ قورىنا جوعارى باعا بەرىلىپ قويعان. ءبىراق، بۇل رەتتە جاڭا داۋىردە جەر استى سۋلارىنىڭ حالىقارالىق قورىنىڭ بولجامدى بالانسى ەسەپتەلمەگەن. ەسكى گيدرولوگيالىق تۇسىرىلىمدەر قازىرگى اقپاراتتىق تالاپقا ساي كەلمەيدى. زەرتتەلگەن كەيبىر اۋماققا قۇرىلىس سالىنىپ كەتكەن. كەيبىرى سانيتارلىق تالاپتارعا ساي كەلمەيدى»، - دەدى ول.
سەناتور قازاقستاننىڭ سۋدى ۇنەمدەپ پايدالانۋ جاعىنان بارىنشا جۇمىس جۇرگىزىپ جاتقانىن ايتىپ ءوتتى.
«الايدا سۋدى جوعالتۋ كولەمى 40 پايىزدى قۇراپ تۇر. ا ق ش- تا سۋدى جوعالتۋ دەڭگەيى 11 پايىزدى، رەسەيدە 21 پايىزدى، ۇلى بريتانيادا 23 پايىزدى كورسەتكەن»، - دەدى ول.
