قازاقستاندا سوڭعى ەكى اپتادا 440 جۇپ موبيلدى قوسىمشا ارقىلى نەكە قيدىرعان
بۇل تۋرالى ادىلەت ۆيتسە-ءمينيسترى بەكبولات مولدابەكوۆ ءمالىم ەتتى، دەپ حابارلايدى قازاقپارات ءتىلشىسى.
«قازىرگى مالىمەتتى ناقتى بىلمەيمىن. ءبىراق موبيلدى قوسىمشا ارقىلى نەكە قيۋعا ءوتىنىش بەرۋ باستالعالى ەكى اپتا ىشىندە 440 جۇپ Halyk bank موبيلدى قوسىمشاسى ارقىلى تىركەلدى. بۇگىندە اتالعان قوسىمشانىڭ كەرەك ەكەندىگىنە كوزىمىز جەتىپ وتىر»، - دەدى بەكبولات مولدابەكوۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
ۆيتسە-ءمينيستردىڭ ايتۋىنشا، نەكە قيۋمەن قاتار باسقا دا مەملەكەتتىك قىزمەتتەردى موبيلدى قوسىمشانىڭ كومەگىنە جۇگىنۋگە بولادى.
«باسقا دا بانكتەردىڭ موبيلدى قوسىمشاسى ارقىلى تىركەۋگە بولادى. الداعى ۋاقىتتا موبيلدى قوسىمشانى ماكسيمالدى تۇردە ەنگىزەتىن بولامىز»، - دەپ تولىقتىردى ول.
ايتا كەتسەك، 2- اقپاندا ادىلەت مينيسترلىگىنىڭ رەسمي وكىلى تالعات ءۋالي قازاقستاندىقتار موبيلدى قوسىمشا ارقىلى نەكە قيۋدى تىركەۋگە ءوتىنىش بەرە الاتىندىعى تۋرالى ايتقان.
