ءبىر تاۋلىكتە 440 ادام كوز جۇمعان يسپانيا كارانتين رەجيمىن جەڭىلدەتپەك
نۇر-سۇلتان. قازاقپارات - يسپانيا كارانتين رەجيمىن بىرتىندەپ جەڭىلدەتۋدى جوسپارلاپ وتىر، دەپ حابارلايدى قازاقپارات توتەنشە جاعداي رەجيمىن قامتاماسىز ەتۋ جونىندەگى مەملەكەتتىك كوميسسيانىڭ جەدەل شتابىنا سىلتەمە جاساپ.
جەدەل شتاب تاراتقان مالىمەتتەرگە قاراعاندا، وتكەن تاۋلىكتە بۇل ەلدە كوروناۆيرۋس ينفەكسياسىنان تاعى 440 ناۋقاس قايتىس بولدى، بۇل ودان الدىڭعى تاۋلىكتە قايتىس بولعانداردىڭ سانىنان كوپ. تاعى 4635 ادامنىڭ ۆيرۋستى جۇقتىرعانى انىقتالدى.
جالپى العاندا، يسپانياداعى كوروناۆيرۋستان كوز جۇمعاندار سانى 22 مىڭ ادامنان استى. دەگەنمەن، يسپانيادا ىندەتتىڭ تارالۋى باسەڭدەپ كەلەدى. ەل ۇكىمەتى كارانتين رەجيمىن مامىر ايىنىڭ ورتاسىنان باستاپ السىرەتۋدى جوسپارلاپ وتىر.
14 جاسقا تولماعان بالالارعا وسى جەكسەنبى كۇنى دالاعا سەرۋەندەۋگە شىعۋعا رۇقسات ەتىلەدى. بۇعان دەيىن ولارعا ۇيدەن شىعۋعا تىيىم سالىنعان بولاتىن.
فوتو: تاسس
