قازاقستاندا مەديتسينا مەكەمەسى عيماراتتارىنىڭ 44,7 پايىزى توزعان

«بۇگىندە رەسپۋبليكا بويىنشا 6 مىڭنان استام مەملەكەتتىك دەنساۋلىق ساقتاۋ وبەكتىسى حالىققا مەديتسينالىق قىزمەت كورسەتىپ وتىر. ونىڭ ىشىندە 492 اۋرۋحانا جانە 5695 مەديتسينالىق- سانيتاريالىق العاشقى كومەك نىسانى بار. مەديتسينالىق ۇيىم عيماراتتارىنىڭ توزۋ دەڭگەيى - %44,7. اتاپ ايتقاندا، ستاتسيونارلار عيماراتىنىڭ توزۋى - %43,5، ال مەديتسينالىق-سانيتاريالىق العاشقى كومەك ۇيىمدارى - %41,9. سونىمەن قاتار ەلدەگى جۇمىس ىستەپ تۇرعان ستاتسيونارلاردىڭ كوپشىلىگى حالىقارالىق ستاندارت تالاپتارىنا سايكەس كەلمەيدى»، - دەدى اجار عينيات ۇكىمەت وتىرىسىندا.

ونىڭ ايتۋىنشا، مەملەكەت باسشىسىنىڭ تاپسىرماسىنا سايكەس اۋىلدا دەنساۋلىق ساقتاۋدى جاڭعىرتۋ جۇمىسى ءجۇرىپ جاتىر.

«ۇلتتىق جوبا اياسىندا 655 مەديتسينالىق-سانيتاريالىق العاشقى كومەك ورتالىعى سالىنادى. سونداي-اق، ەل بويىنشا 32 كوپبەيىندى اۋداندىق ورتالىق اۋرۋحانا كۇردەلى جوندەۋدەن ءوتىپ، قايتا جاڭارتىلادى. اتالعان شارالار اۋىل تۇرعىندارىنا مەديتسينالىق كومەكتىڭ قولجەتىمدىلىگىن قامتاماسىز ەتۋگە مۇمكىندىك بەرەدى»، - دەيدى مينيستر.

ودان بولەك، ا. عينيات قالالاردا بىرنەشە دەنساۋلىق ساقتاۋ مەكەمەسى سالىناتىنىن حابارلادى.

- استانا جانە الماتى قالالارىندا 2 عىلىمي-يننوۆاتسيالىق كوپبەيىندى كلينيكا؛

- مەملەكەتتىك-جەكەمەنشىك ارىپتەستىك شەڭبەرىندە 8 كوپبەيىندى اۋرۋحانا؛

- 12 پەريناتالدى ورتالىق؛

- ونكولوگيا ورتالىقتارىنىڭ جەلىسى.

سونىمەن قاتار، بۇگىندە مىنا وڭىرلەردە قۇرىلىس جالعاسىپ جاتىر:

- قوستاناي، الماتى وبلىستارىندا 3 اۋداندىق ەمحانا؛

- قىزىلوردا، پاۆلودار وبلىستارىندا 2 كوپبەيىندى اۋرۋحانا (قايتا جوندەۋ)؛

- ماڭعىستاۋ وبلىسىندا اۋداندىق ورتالىق اۋرۋحانا؛

- قىزىلوردا قالاسىندا قان ورتالىعى.