يراندا كوروناۆيرۋستان كوز جۇمعاندار سانى 43 بولدى

تەگەران. قازاقپارات - يراندا كوروناۆيرۋستان كوز جۇمعاندار سانى 43 كە جەتتى. تاعى 205 ادام اتالمىش ۆيرۋستى جۇقتىرىپ ۇلگەرگەن، دەپ حابارلايدى قازاقپارات يرنا اگەنتتىگىنە سىلتەمە جاساپ.

بۇل جونىندە سەنبى كۇنى ەلدىڭ دەنساۋلىق ساقتاۋ مينيسترلىگىنىڭ وكىلى كيانۋش دجاحانپۋر مالىمدەدى. ونىڭ ايتۋىنشا، ينفەكسيا جۇقتىرعاندار سانى 593 بولدى. ونىڭ ىشىندە 123 ادام اۋرۋدان جازىلعان، 43 ادام ومىردەن وزعان. «جاڭا جاعدايلاردىڭ كوپشىلىگى، ياعني 52 ءسى تەگەراندا تىركەلىپ وتىر. كۋمدا - 21, گيلياندا - 17, گولەستاندا - 22, يسفاحاندا - 12, ماركازي پروۆينتسياسىندا - 18, مازەندەراندا - 12, وڭتۇستىك حوراساندا - 1, يلامدا - 1, فارس پروۆينسياسىندا - 8, شىعىس ازەربايجاندا - 6, اردەبيلدە - 3, البورزدا - 8, سەمناندا - 4, كۇردىستاندا - 5, كازۆيندە - 6, حۋزەستاندا - 4, سيستان جانە بەلۋدجيستان پروۆينتسياسىندا - 1 جانە يەزدە - 4 جاعداي بولدى. ونىڭ ىشىندە 9 ادام قايتىس بولدى» ، - دەپ اتاپ ءوتتى ول. ايتا كەتەيىك، بۇكىل الەمدە 85 مىڭنان استام ادام كوروناۆيرۋس جۇقتىرعان، ونىڭ 2,9 مىڭى اتالمىش ىندەتتەن كوز جۇمدى.