استانادا 43- دۇنيەجۇزىلىك ءداستۇرلى مۋزىكا كونفەرەنسياسى وتەدى

استانا. قازاقپارات - جۋىردا قازاق ۇلتتىق ونەر ۋنيۆەرسيتەتىندە دۇنيە جۇزىندەگى ەڭ ءىرى مادەني شارالاردىڭ ءبىرى - 43- دۇنيەجۇزىلىك ءداستۇرلى مۋزىكا كونفەرەنسياسى (ICTM) وتەدى.

بۇل تۋرالى ق ر پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا قازاق ۇلتتىق ونەر ۋنيۆەرسيتەتىنىڭ رەكتورى ايمان مۇساقوجايەۆا ءمالىم ەتتى.

«بيىلعى جىلدىڭ 16-22 -شىلدەسى ارالىعىندا استانادا دۇنيەجۇزىلىك ءداستۇرلى مۋزىكا كونفەرەنسياسى (ICTM) وتەدى. ءداستۇرلى مۋزىكاعا ارنالعان بۇل كونفەرەنسيا وسىمەن 43- رەت وتكىزىلىپ وتىر. وسىدان ەكى جىل بۇرىن قىتايداعى شاڭحاي قالاسىندا وتكەن كونفەرەنسيانىڭ باسقارۋ كوميتەتى كەلەسى كونفەرەنسيانى استانادا وتكىزۋ تۋرالى شەشىم قابىلداعان بولاتىن. كونفەرەنسيا ءاربىر ەكى جىل سايىن ۇيىمداستىرىلاتىنىن ايتا كەتۋ كەرەك، نەگىزى ونىڭ جۇمىس ىستەپ كەلە جاتقانىنا بيىل 86 جىل تولىپ وتىر.

بۇعان دەيىن اتالعان كونفەرەنسيا ت م د ەلدەرىنىڭ ەشقايسىسىندا وتكىزىلمەگەن بولاتىن. بيىل كونفەرەنسياعا قاتىسۋ ءۇشىن 70 مەملەكەت ءوتىنىش ءبىلدىرىپ، ول ەلدەردەن 640 تان استام عالىمدار مەن ساراپشىلار كەلەدى، ولار ۇلتتىق ونەر سالاسىنداعى ماسەلەلەر جايىن جان-جاقتى تالقىلايدى. سونداي- اق اتالعان كونفەرەنسيا بويىنشا ماتەريالدار، جيناقتار، وقۋلىقتار، ماقالالار مەن جازبالار جارىق كورەدى. بىز ءۇشىن بۇل قاجەت. بىز ەڭ الدىمەن ءوز مادەنيەتىمىزدى مەڭگەرۋىمىز كەرەك»، - دەيدى ا. مۇساقوجايەۆا.

ونىڭ ايتۋىنشا، قازاقستان، ا ق ش، رەسەي، جاپونيا، قىتاي، برازيليا، تۇركيا، وڭتۇستىك افريكا، چەحيا، ۇلى بريتانيا، كانادا، پورتۋگاليا جانە باسقا دا الەم ەلدەرىنەن كەلگەن وكىلدەر ءبىر اپتا بويى ءداستۇرلى ۇلتتىق ونەر مەن مادەنيەتتى مەڭگەرۋ ماسەلەلەرىن تالقىلايدى.

 اۆتور: ءابۋ-اسقار مەكەش ۇلى