عالىمدار: ميدىڭ قارتايۋى 43 جاستان باستالادى

استانا. قازاقپارات - ادامنىڭ ميى 43 جاستان باستاپ قارتايادى. كەزەكتى زەرتتەۋىنىڭ بارىسىندا عالىمدار وسىنداي توقتامعا كەلدى. ادامنىڭ ويلاۋ قابىلەتى قارت كەزىندە ەمەس، ءدال وسى شاقتا تومەندەي باستايتىنى انىقتالدى.

تاجىريبەنى وتكىزۋ ءۇشىن 40-70 جاس ارالىعىنداعى 7 مىڭ ەرىكتى ازامات شاقىرىلدى. ولار ساۋالناما پاراعىنىڭ سۇراقتارىنا جاۋاپ بەرىپ، باس ميىنىڭ زەرتتەۋىنەن وتكەن. ونىڭ قورىتىندىسىندا ادامنىڭ اقىل-وي قابىلەتى 43 جاستا تومەندەي باستايتىنى انىقتالعان. 45 جاسقا كەلگەن قاتىسۋشىلاردىڭ 60 پايىزى اقپاراتتى جارىم-جارتىلاي ۇمىتا باستاسا، 50 جاستاعىلار ءۇشىن وزدەرى سويلەسكەن اداممەن اڭگىمەنىڭ ءمانىن ۇعىنۋ قيىن بولدى. بۇل رەتتە ەر ادامدار ايەلدەردەن گورى باس ميىنىڭ بەلسەندىلىگىن تەزىرەك ءارى ەرتەرەك جوعالتادى ەكەن، دەپ حابارلايدى Svopi پورتالىنان.

ماماندار مۇنى ايەلدەردىڭ جاۋاپكەرشىلىگىنىڭ جوعارىلىعىمەن، مي جۇمىسىنىڭ بەلسەندىلىگىن تومەندەتۋگە جول بەرمەيتىن قىزمەتىنىڭ كوپ بولۋىمەن بايلانىستى ەكەندىگىمەن ءتۇسىندىردى.