كوپ بالالى وتباسىلارعا 42 مىڭ پاتەر جالعا بەرىلەدى
بۇل تۋرالى قۇرىلىس جانە تۇرعىن ءۇي كوممۋنالدىق شارۋاشىلىق ىستەرى كوميتەتىنىڭ ءتوراعاسى مارحابات جايىمبەتوۆ بۇگىن نۇر-سۇلتان قالاسىندا وتكەن كوپ بالالى جانە از قامتىلعان وتباسىلارمەن كەزدەسۋ بارىسىندا ءمالىم ەتتى، دەپ حابارلايدى قازاقپارات ءتىلشىسى.
«ەلباسىنىڭ «Nur Otan» پارتياسىنىڭ XVIII سەزىندە بىزگە تاپسىرعان نەگىزگى ءۇش تاپسىرماسى بار. ول الدىمەن باسپانا ماسەلەسى، ەكىنشى حالىقتى تازا اۋىزسۋمەن قامتۋ جانە جەرگىلىكتى جەرلەردەگى جول ماسەلەسىن شەشۋ. بەرىلگەن تاپسىرمادان سوڭ ءبىز قازاقستاننىڭ ءار وڭىرىندەگى 50 شاقتى ەلدى مەكەندە بولىپ، تۇرعىندارمەن كەزدەسۋ ۇيىمداستىردىق. حالىقتىڭ مۇڭ-مۇقتاجىن تىڭداي وتىرىپ بايقاعانىمىز، كومەك- قولداۋ سۇراپ كەلگەن تۇرعىنداردىڭ %70-80 باسپانا ماسەلەسىن شەشىپ بەرۋدى سۇرادى»، - دەدى كوميتەت ءتوراعاسى مارحابات جايىمبەتوۆ.
ونىڭ ايتۋىنشا، بۇگىندە ەلىمىزدە 340 مىڭ كوپ بالالى وتباسى بار، ونىڭ 28126 تۇرعىن ءۇي كەزەگىندە تۇر جانە سوڭعى ەكى جىل ىشىندە 1193 وتباسى باسپانالى بولدى.
«بۇرىن مەملەكەت تاراپىنان كوپ بالالى وتباسىلارعا جىلىنا 600 پاتەر بەرىلەتىن بولسا، بيىلدان باستاپ بۇل كورسەتكىش ون ەسەگە ارتىپ، ەندى جىل سايىن 6 مىڭ پاتەر بەرىلەدى. بۇل ماقساتقا بيۋجەتتەن 50 ميلليارد تەڭگە قارجى قاراستىرىلعان. ياعني، الداعى 7 جىلدىڭ ىشىندە (2019-2025 ج ج) كوپ بالالى وتباسىلار ءۇشىن 42 مىڭ جالعا بەرىلەتىن پاتەر سالىناتىن بولادى. ونىڭ ىشىندە نۇر-سۇلتان قالاسىنا توقتالساق 7 جىل ىشىندە 616 پاتەر سالىنادى، بۇل ءۇشىن 5 ميلليارد تەڭگە قاراجات بولىنەدى»، - دەدى ول.
كوميتەت باسشىسىنىڭ دەرەگىنە سۇيەنسەك، ەلىمىز بويىنشا تۇرعىن ءۇي كەزەگىندە تۇرعان كوپ بالالى وتباسىلاردىڭ كوشىن تۇركىستان وبلىسى باستاپ تۇر - 4832 وتباسى، ەكىنشى ورىندا الماتى وبلىسى - 3149 وتباسى، تيىسىنشە ۇشتىكتى نۇر- سۇلتان قالاسى تۇيىندەيدى، ەلوردادا 2888 وتباسى باسپاناعا مۇقتاج.
«بۇل شارالاردان بولەك، مەملەكەت تاراپىنان كوپ بالالى جانە از قامتىلعان وتباسىلار ءۇشىن تومەن پايىزدىق زايممەن باسپانا الۋ مۇمكىندىكتەرى قاراستىرىلۋدا. بۇل كەزەكتى كۇتپەيمىن دەگەن وتباسىلارعا ارنالادى. ول ءۇشىن بيۋدجەتتەن 150 ملرد تەڭگە قاراجات ءبولىندى. ياعني، الداعى 3 جىلدىڭ ىشىندە 18 مىڭ زايم بەرەمىز، بۇل دەگەنىمىز 18 مىڭ وتباسى باسپانالى بولادى دەگەن ءسوز.
مىسالى، ءبىر وتباسى جەڭىلدەتىلگەن پايىزبەن 8 ميلليون تەڭگەنىڭ پاتەرىن كرەديتكە السا، ول العاشقى 8 جىل 42,1 مىڭ تەڭگە، ودان كەيىنگى جىلدارى 27,4 مىڭ تەڭگە تولەيتىن بولادى. وسى باعدارلاما ءساتتى جۇزەگە اسىرىلعان جاعدايدا 56 مىڭ پاتەرگە دەيىن جەڭىلدەتىلگەن زايممەن بەرۋ جوسپارى بار»، - دەدى م. جايىمبەتوۆ.