اقتوبەدە كۇن 42 گرادۋسقا دەيىن ىسيدى
اقتوبە وبلىسىنىڭ توتەنشە جاعدايلار قىزمەتى 8-10- شىلدە ارالىعىندا اۋا تەمپەراتۋراسى 42 گرۋسقا دەيىن كوتەرىلەتىنىن مالىمدەدى. قاتتى ىستىق تۋرالى حابارلاما وبلىس تۇرعىندارىنىڭ ۇيالى تەلەفوندارىنا ءتۇسىپ جاتىر. ال بۇل كەزدە دارىگەرلەر ىستىققا شىداماي، ەم ىزدەگەن ناۋقاستاردىڭ ارتقانىن حابارلادى.
«كۇن ىسىپ، اۋا تەمپەراتۋراسى 38-40 گرادۋسقا دەيىن كوتەرىلدى. جاسى 60 تان اسقان ادامداردىڭ قان قىسىمى ارتىپ، ءجيى كومەك سۇراپ كەلەدى، شاقىرتادى. ولار ءدارىنى مىندەتتى تۇردە ءىشىپ ءجۇرۋى كەرەك. باس كيىمسىز دالاعا شىعۋعا تىيىم سالىنعان، سۋسىز ءجۇرۋ دە قاۋىپتى. كەزەك كۇتىپ وتىرىپ، عيمارات ىشىندە اۋا جەتپەي قينالاتىن جاعدايلار دا بار»، - دەدى №1 قالالىق ەمحانانىڭ جالپى تاجىريبەلى دارىگەرى نۇرلىگۇل قانىمبايەۆا.
دارىگەرلەر مەرەكە كۇندەرى دە كەزەكشىلىكپەن جۇمىس ىستەپ وتىر. ەم ىزدەپ كەلگەندەردىڭ كوبى قان قىسىمى كوتەرىلگەنىن ايتىپ، ەم قابىلداعان. «كوكونىس، جەمىس- جيدەكپەن تاماقتانعان دۇرىس. تويىپ تاماق ىشۋدەن باس تارتۋعا كەڭەس بەرەمىن. قان قىسىمى ءتۇسىپ كەتەتىندەر دە بار. ولار 60/90، ءتىپتى 40/60 بولىپ كەلەدى. سۋ مەن دارۋمەنگە باي تاعام پايدالى. ۇيدەن شىقپاي، كەشكى سالقىندى كۇتۋ كەرەك»، - دەدى نۇرلىگۇل قانىمبايەۆا.
