شىعىس قازاقستاندا 42 جاستاعى ۆەلوسيپەدشىگە جاي ءتۇستى
بۇل وڭىردە جاي ءتۇسۋ سالدارىنان ادام قازا تاپقان العاشقى جاعداي ەمەس. بۇرىن حابارلانعانداي، 30 -مامىردا اباي اۋدانىندا جاي ءتۇسۋ سالدارىنان اتقا مىنگەن 65 جاستاعى شوپان اجال قۇشتى. ەكى اپتا بۇرىن وسى اباي اۋدانىندا جايلاۋدا جۇرگەن جىلقىعا جاي ءتۇستى.
ايماقتا بىرنەشە اپتا نوسەرلى جاۋىن جاۋىپ، نايزاعاي ويناپ تۇر. «قازگيدرومەت» فيليالىنىڭ اقپاراتىنشا، بۇل اپتانىڭ سوڭىنا دەيىن سوزىلادى.
توتەنشە جاعداي قىزمەتى نايزاعاي بولعاندا عيمارات ىشىندە كۇتۋگە، ەلەكتر جابدىقتاردىڭ بارلىعىن سوندىرۋگە، سپۋتنيكتىك انتەننانىڭ تيۋنەرىن كابەلدەن اجىراتۋعا كەڭەس بەرەدى. ەگەر نايزاعاي سوققان جاعدايدا دالادا قالسا، ابىرجىماي، مەتالل زاتتاردان اۋلاق جۇرۋگە تىرىسۋ كەرەك. جىلقى نەمەسە ۆەلوسيپەد ۇستىندە بولساڭىز، ودان ءتۇسۋ كەرەك. مۇنداي كەزدە اعاشعا شىعۋعا، ۇيالى تەلەفوندى پايدالانۋعا بولمايدى.
«ەگەر سۋ قويماسىندا دەمالىپ جاتساڭىز، سۋدان شىعىپ، پالاتكاعا نەمەسە كولىككە بارىپ وتىرىڭىز، مەتالل زاتتاردى اۋلاق ۇستاڭىز»، - دەپ ەسكە سالدى ت ج د.
