ءار بالاعا 42500 تەڭگە جاردەماقى بەرىلە مە - اسقار نيازوۆ جاۋابى

نۇر-سۇلتان. قازاقپارات – ق ر ەڭبەك جانە حالىقتى الەۋمەتتىك قورعاۋ مينيسترلىگى الەۋمەتتىك كومەك ساياساتىن دامىتۋ دەپارتامەنتىنىڭ ديرەكتورى اسقار نيازوۆ اتاۋلى الەۋمەتتىك كومەك مولشەرى قالاي ەسەپتەلەتىندىگىن ءتۇسىندىردى، دەپ حابارلايدى قازاقپارات ءتىلشىسى.

«ءار بالاعا 42500 تەڭگەدەن جاردەماقى تولەۋ ماسەلەسىن جان- جاقتى قاراستىردىق، زەردەلەدىك. 42500 تەڭگەدەن، 20 مىڭ تەڭگەدەن جاردەماقى قاراستىرۋدى ۇسىنعاندار دا بولدى. ءبىراق، ورتاق ىمىراعا كەلە وتىرىپ، كوپبالالى وتباسىلاردىڭ ءار بالاسىنا 4 ا ە ك مولشەرىندە، ياعني 11668 تەڭگەدەن جاردەماقى تولەۋ شەشىمى قابىلداندى جانە قازىرگى ۋاقىتتا بەرىلىپ جاتىر. ەلىمىزدە 18 جاسقا تولماعان 6,2 ميلليون بالا بار. ەگەر 42500 تەڭگەنى 6,2 ميلليونعا كوبەيتسەك، اي سايىن 263 ميلليارد تەڭگە، جىلىنا 3,2 تريلليون تەڭگە شىعادى. ال ەڭبەك مينيسترلىگىنىڭ حالىققا كورسەتەتىن الەۋمەتتىك قولداۋ ءىس- شارالارىنا جۇمسايتىن قاراجاتى 3,9 تريلليون تەڭگەنى قۇرايدى. بۇل رەسپۋبليكالىق بيۋدجەتتىڭ 24 پايىزىنا تەڭ. ەندى وعان 3,2 تريلليون تەڭگە قوساتىن بولساق، وندا بۇل ەلىمىزدىڭ دەنساۋلىق ساقتاۋ، ءبىلىم، قورعانىس، تۇرعىن ءۇي جانە باسقا دا ماڭىزدى سالالارعا جۇمسالاتىن قاراجاتىنىڭ شەكتەلۋىنە اكەپ سوعۋى مۇمكىن»، - دەدى ول ورتالىق كوممۋنيكاتسيالار قىزمەتىندەگى بريفينگ بارىسىندا ب ا ق وكىلدەرىنىڭ ساۋالىنا وراي.

دەپارتامەنت باسشىسىنىڭ اتاپ وتۋىنشە، ەڭبەك مينيسترلىگى جوعارىدا اتالعان جايتتاردى ەسكەرە كەلە، ءار بالاعا اي سايىن 42500 تەڭگەدەن جاردەماقى تولەۋ ۇسىنىسىن قولداعان جوق.