قازاقستاندىقتار 42500 تەڭگە الەۋمەتتىك تولەمدى قايتارۋعا مىندەتتى مە؟
الەۋمەتتىك جەلىلەر مەن مەسسەندجەرلەردە ت ج رەجيمىنە بايلانىستى تابىسىن جوعالتقاندارعا تولەنگەن 42500 تەڭگە مولشەرىندەگى تولەمدەردى قايتارۋ قاجەت دەگەن قاۋەسەت تاراۋدا. پايدالانۋشىلار بانكتەردىڭ موبيلدىك قوسىمشالارىنداعى «الەۋمەتتىك كومەكتى قايتارۋ» پاراقشالارىنىڭ ەكراننان تۇسىرىلگەن سۋرەتتەرىن جىبەرۋدە.
مەملەكەتتەن الىنعان قاراجاتتى قايتارۋعا بولادى. ءبىراق، مىندەتتى ەمەس.
- توتەنشە جاعداي كەزىندە كەيبىر ادامدار الەۋمەتتىك تولەمدەردى زاڭسىز الدى، ولار كىرىستەرىن جوعالتپاعان. ولاردىڭ كەيبىرەۋى بۇل قاراجاتتى مەملەكەتكە قايتارۋ تۋرالى شەشىم قابىلدادى. تولەمدەر تولەنە باستاعالى ونى شامامەن 180000 ادام قايتاردى. بۇل ەرىكتى تۇردە جۇزەگە اسىرىلادى. ازاماتتاردى بۇل اقشانى قايتارۋعا مىندەتتەيتىن نورمالار مەن زاڭدار جوق، - دەپ ءتۇسىندىردى ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ رەسمي وكىلى الەكساندر كونونەتس.
قاتەلەسىپ العان الەۋمەتتىك كومەكتى قايتارۋ ءۇشىن Kaspi Bank موبيلدى قوسىمشاسىندا ءتيىستى فۋنكسيانى ىسكە قوسىلدى. بۇل وتە ىڭعايلى. ول ساۋىردەن باستاپ جۇمىس ىستەپ كەلەدى جانە توتەنشە جاعداي رەجيمى كەزىندە 42500 تەڭگە العانداردىڭ بارىنە قولجەتىمدى بولدى. قازىر ونىڭ قىزمەتى توقتاتىلدى. - كارانتين كەزىندە الەۋمەتتىك تولەم العان، ءبىراق تابىسىن جوعالتپاعان ازاماتتار ءۇشىن اقشا قاراجاتىن قايتارۋ فۋنكسياسى Kaspi.kz موبيلدىك قوسىمشاسىندا ىسكە قوسىلعان. بۇل تولەمدەردى قايتارۋ - ءاربىر ق ر ازاماتىنىڭ ەرىكتى جانە دەربەس شەشىمى، - دەلىنگەن StopFake.kz Kaspi Bank پورتالىنا جولداعان ساۋالىنا بەرىلگەن رەسمي جاۋاپتا. «بارشاڭىزدى تەك رەسمي اقپاراتقا عانا سەنۋگە شاقىرامىز» دەپ جازادى پورتال.
