ءۇش ميلليونعا جۋىق ازاماتقا 42500 تەڭگە تولەۋدەن نەلىكتەن باس تارتىلدى

ونىڭ سەبەپتەرىن ورتالىق كوممۋنيكاتسيالار قىزمەتىندەگى بريفينگىدە ق ر ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ ءتۇسىندىرىپ بەردى، دەپ حابارلايدى قازاقپارات ءتىلشىسى.

«ءبىز 3 ميلليونعا جۋىق ادامنىڭ وتىنىشىنەن باس تارتتىق. وسىعان قاتىستى دا ساۋالدار ءتۇسىپ جاتقاندىقتان تۇسىندىرە كەتەيىن. ءبىرىنشىسى، جەكە سايكەستەندىرۋ ءنومىرىن دۇرىس كورسەتپەگەن. 12 سيفردى جاڭىلىسپاي، تياناقتى تۇردە دۇرىس كورسەتكەندەرىڭىز ءجون. سەبەبى ج س ن-دى تەكسەرگەندە سىزدىكى ەمەس، باسقا ادامدىكى بولىپ شىعۋى مۇمكىن. سوندىقتان مۇنداي قاتەلەردى تۇزەتىپ، قايتا جىبەرۋ كەرەك. 160 مىڭداي ادام وسىنداي قاتە جىبەرگەن»، - دەدى مينيستر.

ونىڭ ايتۋىنشا، ەكىنشىدەن، بانكتەردىڭ رەكۆيزيتتەرىنە، ەسەپشوتتارعا قاتىستى دا كوپ ماسەلە تۋىنداپ جاتىر. ياعني، ازاماتتار ءوتىنىش بەرگەن كەزدە KZ دەپ باستالاتىن 20 سيفردى كورسەتۋ قاجەت.

«كەيبىرەۋلەر كارتالارىنىڭ 16 سيفرلى ءنومىرىن كورسەتەدى. ءبىز بانكتەگى ءسىزدىڭ 20 سيفرلى ەسەپشوتىڭىزعا، ال بانك كارتاڭىزعا اۋدارىپ بەرەدى. وسى رەتتە سىزدەردىڭ ەسەپشوتتارىڭىزدى قالاي تەكسەرەتىندىگىمىزدى ءتۇسىندىرىپ بەرەيىن. ءوتىنىش كەلگەندە بانكتىك ەسەپشوتىڭىزدىڭ 20 سيفرلى ما ەكەندىگىن تەكسەرەمىز. 19 سان بولسا دۇرىس ەمەس. KZ دەگەننەن كەيىنگى ساندار قاي بانكتەگى ەسەپشوت ەكەنىن كورسەتەدى. ەگەر ول جابىلىپ قالعان بانك بولسا، وندا وتىنىشتەرىڭىزدى كەرى قايتارىپ جاتىرمىز. 20 سانى تۇگەل بولسا تولەم تاعايىنداۋعا جىبەرەمىز»، - دەدى ول.

ءمينيستردىڭ دەرەگىنشە، ءدال وسى جەردە تاعى ءبىر پروبلەمالار تۋىنداپ وتىر.

«تولەم تاعايىندالعاننان كەيىن 1 جۇمىس كۇنىنىڭ ىشىندە سىزدەر كورسەتكەن ەسەپشوتقا قاراجاتتى اۋدارامىز. ءبىراق، وسى كۇندەرى 800 مىڭنان استام ادامنىڭ اقشا اۋدارىلعان ەسەپشوتىنان بانك بىزگە كەرى قايتارىپ جىبەردى. سويتسەك، سىزدەردىڭ بەرگەندەرىڭىز ول بانكتەردە جابىلىپ قالعان ەسەپشوتتارىڭىز ەكەن. سودان كەيىن سول بانكتەگى قولدانىستاعى باسقا ەسەپشوتتارىڭىزعا اۋدارىپ بەردىك. مۇنان بولەك، 70 مىڭ ادامنىڭ ول بانكتە 20 سيفرلى ەسەپشوتى بولماي شىقتى. سوندىقتان سىزدەرگە «باسقا، دۇرىس بانك ەسەپشوتىن كورسەتىڭىزدەر» دەگەن س م س جىبەرىلەدى»، - دەدى ءبىرجان نۇرىمبەتوۆ.

سونىمەن قاتار، مينيستر ۇشىنشىدەن مەملەكەتتىك قىزمەتشىلەردىڭ، جابىلماعان مەكەمەلەردىڭ قىزمەتكەرلەرىنىڭ وتىنىشتەرى كەرى قايتارىلىپ جاتقاندىعىن ايتتى.

«مەملەكەتتىك ورگاندارعا، ۇيىمدارعا 42500 تەڭگەنىڭ قاتىسى جوق. سەبەبى ولاردىڭ جۇمىستارى شەكتەلگەن جوق. ولار قاشىقتان جۇمىس ىستەپ جاتىر. سوندىقتان مەملەكەتتىك قىزمەتشىلەردىڭ ءوتىنىش تولەۋ، ءبىرىڭعاي جيىنتىق تولەم تولەۋى قاجەت ەمەس. ءتىپتى، مەملەكەتتىك قىزمەتكەرگە ب ج ت تولەۋگە بولمايدى. سەبەبى ب ج ت تولەگەن ادام كاسىپكەرلىكپەن اينالىساتىندىعىن بىلدىرەدى. ال مەملەكەتتىك قىزمەتكەرگە كاسىپكەرلىكپەن اينالىسۋعا بولمايدى»، - دەدى ەڭبەك ءمينيسترى.

ونىڭ اتاپ وتۋىنشە، زەينەتكەرلەر مەن مۇگەدەكتەردىڭ دە وتىنىشتەرى كەرى قايتارىلىپ جاتىر. جالپى، بۇل ساناتتاعى ادامدار توتەنشە جاعدايعا دەيىن رەسمي تۇردە جۇمىس ىستەپ، الەۋمەتتىك تولەمدەر اۋدارىلسا، ال قازىر تابىسىنان ايىرىلسا عانا 42500 تەڭگە بەرىلەدى.

«تورتىنشىدەن، ءوتىنىشى كەرى قايتارىلعان 1 ميلليوننان استام ادامنىڭ سوڭعى 12 ايدا مەملەكەتتىك ساقتاندىرۋ قورىنا الەۋمەتتىك تولەمدەرى تولەنبەگەن. مۇنداي تولەم نەگىزگى شارت بولعاننان كەيىن وتىنىشتەردى كەرى قايتارۋعا ءماجبۇرمىز. سوڭعىسى قايتىس بولىپ كەتكەن ادامداردىڭ نەمەسە شەتەلگە كوشىپ كەتىپ، سول جاقتا تۇرىپ جاتقان ادامداردىڭ اتىنان دا ءوتىنىش بەرىلىپ جاتىر»، - دەدى ول.

اۆتور: مارلان جيەمباي