سوڭعى ءۇش كۇندە 42500 تەڭگەنى الۋ ءۇشىن 1,2 ميلليون ءوتىنىش ءتۇستى - مينيستر

None
None
نۇر-سۇلتان. قازاقپارات - بۇل تۋرالى ورتالىق كوممۋنيكاتسيالار قىزمەتىندە وتكەن توتەنشە جاعداي كەزىندەگى كىرىستى جوعالتقان ازاماتتارعا الەۋمەتتىك تولەمدەردەن الەۋمەتتىك جاردەماقى تاعايىنداۋ بويىنشا ونلاين بريفينگتە ايتىلدى، دەپ حابارلايدى قازاقپارات ءتىلشىسى.

«مەملەكەتتىك ساقتاندىرۋ قورىنان تولەنەتىن 42500 تەڭگە - رەسمي جانە بەيرەسمي جۇمىس ىستەپ جۇرگەن، ءبىراق توتەنشە جاعدايعا بايلانىستى تابىسىنان ايىرىلعان ادامدار ءۇشىن قاراستىرىلعان تولەم. بۇل - كومەكتىڭ ءبىر ءتۇرى عانا. زەينەتاقى، جاردەماقى ۋاقىتىلى تولەنۋدە. اي سايىن 300 ميلليارد تەڭگەگە دەيىن تولەنۋدە. ول يندەكستەلەدى. كاسىپكەر ازاماتتارعا ۇكىمەت تاراپىنان سالىق، نەسيە، كوممۋنالدىق شىعىنداردى تولەۋ مەرزىمىن كەيىنگە شەگەرۋگە قاتىستى كوپتەگەن جەڭىلدىكتەر قاراستىرىلىپ جاتىر. از قامتىلعان، كوپبالالى وتباسىلار، مۇگەدەك جاندار جاسىنا، ساناتىنا قاراماستان، مۇگەدەك بالانى تاربيەلەپ وتىرعان اتا-انالار، رەسمي جۇمىسسىز رەتىندە تىركەلگەن ادامدارعا بيۋدجەتتىڭ ەسەبىنەن، « ءبىز بىرگەمىز « قورىنىڭ ەسەبىنەن جانە ەلىمىزدەگى پاتريوت ازاماتتاردىڭ اتىنان ازىق- تۇلىك توپتامالارى جانە اقشالاي كومەك كورسەتىلىپ جاتىر. جۇمىسسىز قالعان ازاماتتارعا وسى ساقتاندىرۋ قورىنان بولەك جۇمىسىنان ايىرىلعان جاعدايداعى تولەم بار»، - دەيدى ق ر ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ. ول مەملەكەتتىك ساقتاندىرۋ قورىنان تولەنەتىن تولەمگە ءوتىنىش قابىلدايتىن egov.kz جانە 42500.enbek.kz پورتالى جۇمىس ىستەپ جاتقانىن ايتتى.

«سوڭعى ءۇش كۇندە 42500.enbek.kz پورتالىنا 1284000 ءوتىنىش كەلىپ ءتۇستى. قازىرگى ۋاقىتتا ەلەكتروندىق قولتاڭبا قولدانۋ قاجەتتىگى جوق. ونى سمس ارقىلى كەلەتىن پارولمەن راستاۋعا بولادى. تەلەگرام- بوت بۇگىن ىسكە قوسىلدى. ونىڭ قوسىلۋى كەشىككەن سەبەبى - الاياق ادامدار فەيك تەلەگرام- بوتتاردى جاريالاپ، حالىقتى جاڭىلىستىردى»، - دەيدى ول.

اۆتور: زارينا قاھارمان

سوڭعى جاڭالىقتار