اكەسى قانات ايتبايەۆ: ديماش 42 كۇندە 78 رەت ۇشاققا ءمىندى
حالىق اراسىندا «قىتايدا جانكۇيەرلەرى كوپ بولعان سوڭ، ديماش قىتايعا كوشىپ كەتكەن ەكەن» دەپ ايتۋشىلار دا بار. ديماشتىڭ اكەسى قانات ايتبايەۆ Stan.kz اقپاراتتىق اگەنتتىگىنىڭ تىلشىسىنە وسى جايىندا ءوز پىكىرىن ءبىلدىردى.
ديماش قۇدايبەرگەن تەك قازاقستاندا ەمەس، الەمدە ەكونوميكاسى مىقتى دامىعان ەلدەردە كونسەرت قويادى. ءوز ەلىڭنەن بولەك، شەت مەملەكەتتە بىرگە جۇمىس ىستەي ءبىلۋ - اركىمنىڭ قولىنان كەلە بەرەتىن دۇنيە ەمەس.
«ديماش ءبىر كۇنى پەكيندە، ەكىنشى كۇنى امەريكادا جۇرەدى. وتكەن جولى ول 42 كۇندە 78 رەت ۇشاققا ءمىندى. جاقىندا عانا گەرمانيا، يتاليا، رەسەي مەملەكەتتەرىنە بارىپ قايتتىق. قىتايعا بارىپ، قايتىپ كەلدى. قازىر ديماش ءوزى قاي جەردە تۇراتىنىن ۇمىتىپ قالعان سياقتى (كۇلىپ). ول وسى ەلدىڭ بالاسى. قازاقستاننىڭ تۋىن كوتەرىپ، ەلدىڭ اتىنان تالاي جەرلەرگە، كوپتەگەن ونەر دودالارىنا بارىپ قاتىستى. قاي جەردە دە قازاق جەرىنىڭ اتى اتالىپ، قازاقتىڭ تۋىن كوتەرىپ جۇرسە، ءبىز ءۇشىن ەڭ ۇلكەن جەڭىس سول»، - دەيدى ءانشىنىڭ اكەسى.
ديماش قۇدايبەرگەن باسقا مەملەكەتتەرگە جۇمىس بابىمەن كوپ ساياحاتتايتىن بولسا دا، قازاقستاندى بارىنەن دە جاقسى كورەتىنىن ءىس-ارەكەتتەرى ارقىلى بىرنەشە رەت دالەلدەگەن.
