08:03, 09 - ناۋرىز 2017 | GMT +5
ەۋرووداق يراكقا 42,5 ميلليون ەۋرو كولەمىندە كومەك بەرەدى
استانا. قازاقپارات - ەۋرووداق يراكقا 42,5 ميلليون ەۋرو كولەمىندە كومەك بەرەدى، دەپ جازادى «حابار 24».
قارجى يراك بيلىگىنىڭ ەلدەگى گۋمانيتارلىق داعدارىسپەن كۇرەسۋى ءۇشىن ءبولىنىپ وتىر. ول ەڭ الدىمەن ۇرىس ءجۇرىپ جاتقان موسۋل سياقتى قالالارداعى تۇرعىندارعا قولداۋ كورسەتۋگە جۇمسالماق.
سونداي-اق تۋعان جەرىن تاستاپ، باس ساۋعالاپ كوشكەن ادامداردى ازىق-تۇلىك جانە اۋىزسۋمەن قامتاماسىز ەتۋگە، دەنساۋلىق ساقتاۋ مەن ءبىلىم سالاسىن قالپىنا كەلتىرۋگە بولىنەدى.
ايتا كەتەيىك، يراك - الەمدە ءىرى گۋمانيتارلىق داعدارىسقا ۇشىراپ وتىرعان ەلدەردىڭ ءبىرى. مۇندا «يراك جانە ليەۆانت لاڭكەستىك ۇيىمىنىڭ» ارەكەتىنەن جۇزدەگەن مىڭ ادام باسپانالارىن تاستاپ كەتۋگە ءماجبۇر.
ال ەۋرووداقتىڭ 2015-جىلدان بەرى يراكقا كورسەتكەن كومەگى 309 ميلليون ەۋرودان اسقان.
