بيۋدجەت كىرىستەرى جوسپاردان 41 ميلليارد تەڭگەگە اسىرا ورىندالدى - مينيستر
بۇل تۋرالى ق ر پرەمەر-ءمينيسترىنىڭ ورىنباسارى - قارجى ءمينيسترى ەرۇلان جاماۋبايەۆ ايتتى، دەپ حابارلايدى قازاقپارات ءتىلشىسى.
«بيىلعى بەس ايدا مەملەكەتتىك بيۋدجەتكە 6 تريلليون 554 ميلليارد تەڭگە سوماسىندا كىرىس ءتۇستى نەمەسە جوسپار %107 ورىندالدى. رەسپۋبليكالىق بيۋدجەتكە 4,4 تريلليون تەڭگەگە جۋىق كىرىس ءتۇستى، جوسپاردىڭ ورىندالۋى - %100,9»، - دەدى قارجى ءمينيسترى ۇكىمەتتىڭ بۇگىنگى وتىرىسىندا.
ونىڭ ايتۋىنشا، كىرىستەر بويىنشا جوسپار 41 ميلليارد تەڭگەگە، ونىڭ ىشىندە سالىق - 11 ميلليارد تەڭگەگە، سالىققا جاتپايتىن كىرىس - 29 ميلليارد تەڭگەگە اسىرا ورىندالعان.
«سالىق بويىنشا اسىرا ورىنداۋدىڭ نەگىزگى سومالارى ىشكى ءوندىرىس تاۋارلارىنا سالىناتىن قوسىلعان قۇن سالىعىنا تيەسىلى بولدى. جوسپاردىڭ اسىرا ورىندالۋى بيىلعى 4-ايداعى جۇمىستاردى، قىزمەتتەردى جانە تاۋارلاردى وتكىزۋ بويىنشا اينالىم سومالارىنىڭ وتكەن جىلدىڭ ۇقساس كەزەڭىمەن سالىستىرعاندا %24,4 ۇلعايۋىنا بايلانىستى. كورپوراتيۆتىك تابىس سالىعى، يمپورتقا قوسىلعان قۇن سالىعى جانە شيكى مۇنايعا ەكسپورتتىق كەدەن باجى بويىنشا جوسپار ورىندالعان جوق»، - دەدى ە. جاماۋبايەۆ.
اۆتور: ايجان سەرىكجان قىزى
