جاپونياداعى كريۋز لاينەرىندە تاعى 41 ادامنان كوروناۆيرۋس تابىلدى

توكيو. قازاقپارات - جاپونيا دەنساۋلىق ساقتاۋ مينيسترلىگىنىڭ حابارلاۋىنشا، يوكوگاما ماڭىندا كارانتيندە تۇرعان كريۋز كەمەسىندە تاعى 41 ادامنان كوروناۆيرۋس تابىلعان.

وسىلايشا ۆيرۋس جۇقتىرعان جولاۋشىلاردىڭ سانى 61 بولدى، دەپ حابارلايدى Kyodo.

اۋرۋعا شالدىققانداردىڭ جاسى - 20 مەن 80 ارالىعىندا. ولار توكيو مەن جاقىن ماڭداعى سايتاما، تيبا، كاناگاۆا، سونداي-اق جاپونيانىڭ ورتالىعىنداعى سيدزۋوكا پرەفەكتۋرالارىنداعى مەديتسينا مەكەمەلەرىنە جەتكىزىلەدى. مينيسترلىكتىڭ ماتلىمەتىنشە، ولاردىڭ ەشقايسىسىندا اۋىر سيمپتومدار جوق.

كوروناۆيرۋس جۇقتىرعان 41 ادامنىڭ ىشىندە 21 ءى - جاپون، سەگىزى - امەريكالىق، بەسەۋى - اۆستراليالىق، تاعى بەسەۋى - كانادالىق جانە ارگەنتينا مەن ۇلى بريتانيادان ەكى ادام بار.

«Diamond Princess» لاينەرىنىڭ بورتىندا 56 ەلدەن 3700 گە جۋىق جولاۋشى مەن ەكيپاج مۇشەلەرى بولعان. 80 جاستاعى جولاۋشىدان ۆيرۋس تابىلعان سوڭ كەمە كاناگاۆا پرەفەكتۋراسىنىڭ استاناسىنداعى ايلاققا كارانتينگە قويىلعان ەدى.