تۇڭعىش پرەزيدەنت كۇنى: ەلوردادا 419 وتباسى باسپانالى بولدى
«جاڭا باسپانالى بولىپ جاتقان ازاماتتارمەن سويلەسىپ جاتسام، اراسىندا 13-14 جىل ءۇي كەزەگىندە تۇرعاندار بار ەكەن. بۇل كوپجىلدىق ەڭبەك پەن سابىردىڭ ناتيجەسى دەگەن ءسوز. ەلباسى، ەلوردانىڭ نەگىزىن قالاۋشى نۇرسۇلتان نازاربايەۆ ءوز سوزىندە «كىشكەنە سابىر ەتىپ شىداڭىزدار الەۋمەتتىك جاعداي تۇزەلەدى» دەگەن. مىنە بۇگىندە ەلباسى ايتقانىنداي ەلىمىز قارقىنداپ دامۋدا. بۇگىنگى قونىس تويى سونىڭ ءبىر كورىنىسى. تۇڭعىش پرەزيدەنت ەلوردانى استاناعا كوشىرگەندە وسى جەردىڭ ءبارى دارحان دالا- تۇعىن. ال قازىر ءزاۋلىم عيماراتتار بوي كوتەرگەن اسەم قالاعا اينالىپ وتىر. قالادا حالىق سانى وسكەن سايىن، تۇرعىن ۇيگە دەگەن سۇرانىستا ارتۋدا. سول ءۇشىن دە جىل ساناپ ءتۇرلى مەملەكەتتىك تۇرعىن ءۇي باعدارلامالارى اياسىندا قولجەتىمدى باسپاناعا يە بولۋ مۇمكىندىگى كەڭەيۋدە. بۇگىنگى پاتەر كىلتىن الىپ جاتقانداردىڭ اراسىندا ءتۇرلى الەۋمەتتىك سالا وكىلدەرى بار» - دەدى قالا اكىمى التاي كولگىنوۆ.
اكىم قونىس تويىمەن قۇتتىقتاي وتىرىپ، كوكتەمدە بۇل جەرگە اباتتاندىرۋ جۇمىستارى قولعا الىناتىنىن ايتتى.
باسپانالى بولعانداردىڭ قاتارىندا الەۋمەتتىك وسال توپ ساناتىنا جاتاتىن جانە كوپبالالى وتباسىلار، جەتىم بالالار مەن ۇ و س قاتىسۋشىلارى بار.
«بۇگىن - ءبىزدىڭ وتباسىمىز ءۇشىن ەرەكشە قۋانىشتى كۇن. سەبەبى كوپتەن كۇتكەن وتباسىلىق ارمانىمىز ورىندالىپ جاتىر. ەلىمىزدىڭ باسشىلىعىنا العىسىم شەكسىز. ءوزىم استانادا 1998 -جىلدان باستاپ تۇرىپ كەلەمىن. ال ءۇي كەزەگىندە تۇرعانىما 10 جىل بولدى. ءوزىم 1- توپتاعى مۇگەدەكپىن. 4 بالام بار، كوبىسى مەكتەپ جاسىندا. جولداسىم بالا كۇتىمىمەن ۇيدە وتىر»، - دەيدى باسپانالى بولعان ءادىلحان جۇمابايەۆ.
جالداپ تۇرۋ قۇقىعىمەن بەرىلگەن كوپپاتەرلى تۇرعىن ءۇي كەشەنى قالالىق اكىمدىكتىڭ تاسىرماسى بويىنشا «نۇرلى جەر» مەملەكەتتىك تۇرعىن ءۇي باعدارلاماسى اياسىندا سالىنعان.
ايتا كەتەيىك، قازاقستان رەسپۋبليكاسىنىڭ تۇڭعىش پرەزيدەنتى كۇنىنە وراي اتاۋلى الەۋمەتتىك كومەك الۋشىلار ساناتىنداعى ەلوردالىقتار جاردەماقى الدى. بۇل ساناتقا جان باسىنا شاققانداعى تابىسى كەدەيلىك شەگىنەن تومەن ادامدار كىرەدى. ول ەڭ تومەنگى كۇنكورىس دەڭگەيىنىڭ %70 رەتىندە انىقتالادى. اتاۋلى الەۋمەتتىك كومەك الۋشىلار ءۇشىن الەۋمەتتىك كومەك مولشەرى 4,5 ا ە ك نەمەسە 11363 تەڭگەنى قۇرايدى.
