س ق و-دا ءبىر اپتا ىشىندە ماس جۇرگەن 414 ادام جاۋاپقا تارتىلدى
وسى كەزەڭدە وڭىردە «قاۋىپسىز اپتا» اۋقىمدى جەدەل- پروفيلاكتيكالىق ءىس- شاراسى ءوتتى، دەپ حابارلايدى قازاقپارات ءتىلشىسى.
س ق و پوليتسيا دەپارتامەنتى باسپا ءسوز قىزمەتىنىڭ مالىمەتىنشە، ءبىر اپتا ىشىندە قورعاۋ نۇسقاماسىن بۇزۋدىڭ 13 فاكتىسى جانە قۇقىق بۇزۋشىلاردىڭ مىنەز- قۇلقىنا قويىلاتىن ەرەكشە تالاپتاردىڭ بۇزىلۋىنىڭ 33 دەرەگى انىقتالدى.
«قۇقىق بۇزۋشىلىقتاردىڭ جاسالۋىنا سەبەپ بولاتىن جاعدايلار تۇرعىلىقتى مەكەنجايعا بارعان كەزدە ايقىن كورىنەدى. ماسەلەن، كۇندىز ايەلى جۇمىستا بولعان كەزدە ەسەپتە تۇرعان ەڭبەككە قابىلەتتى كۇيەۋى ىشىمدىككە تويىپ، ۇيدە جاتقان. بىزگە مۇنداي جاعداي تاڭسىق ەمەس. اسىرەسە، تۇرمىستىق زورلىق- زومبىلىق تىركەلگەن ۇيلەردە بۇل ادەتتەگى جاعداي»، - دەيدى ءتارتىپ ساقشىلارى.
پوليتسەيلەر اپتا ىشىندە ەسەپتە تۇرعان 4 مىڭنان استام مەكەنجايدى تەكسەردى. ولاردىڭ جارتىسى - ماسكۇنەم. سونداي- اق تۇرمىسى قولايسىز 304 وتباسى، شارتتى تۇردە مەرزىمىنەن بۇرىن بوساتىلعان 495 ادام، تۇرمىستا قۇقىق بۇزۋشىلىق جاساعان 554 ادام تەكسەرىلدى.
«الكوگولدى اسىرا پايدالاناتىن ادامدار بولاتىن ورىندار، جالعا بەرىلەتىن تۇرعىن ۇيلەر تەكسەرىلدى. الكوگولدى رۇقساتسىز ساتقانى ءۇشىن 20 ادام جاۋاپكەرشىلىككە تارتىلدى. زاڭسىز اينالىمنان قۇرامىندا سپيرت بار 400 ليتردەن استام ءونىم تاركىلەندى»، - دەيدى س ق و پ د جەرگىلىكتى پوليتسيا قىزمەتى باسقارماسىنىڭ باستىعى ايدىن بايماتوۆ.
بۇدان بولەك، وتكەن اپتادا پاترۋلدىك پوليتسيا باتالونىنىڭ قىزمەتكەرلەرى كۇشەيتىلگەن رەجيمدە جول ءجۇرىسى قاعيدالارىنىڭ ورەسكەل بۇزۋشىلىقتارىن انىقتاۋ ءۇشىن تەكسەرۋلەر جۇرگىزدى. ولار 13 ماس جۇرگىزۋشىنى توقتاتتى. ءىس- شارا بارىسىندا 1495 ءتۇرلى قۇقىق بۇزۋشىلىق انىقتالدى.
